Gjashte fëmijë mes viktimave në sulmin me dron në Nuseirat, ushtria pranon “gabim teknik”
Një sulm ajror izraelit në kampin e refugjatëve Nuseirat në Gaza ka shkaktuar vdekjen e dhjetë civilëve, mes tyre gjashtë fëmijë, ndërsa viktimat po prisnin të mbushnin bidonët me ujë. Sipas mjekëve në spitalin Al-Awda, 16 persona të tjerë u plagosën, përfshirë shtatë fëmijë.
Dëshmitarët thanë se një dron lëshoi raketë mbi një grup njerëzish që prisnin pranë një autobote uji. Ushtria izraelite konfirmoi se sulmi kishte për qëllim një anëtar të Xhihadit Islamik, por një “gabim teknik” çoi në devijimin e raketës nga objektivi. Incidenti është nën hetim.
Pamje të verifikuara nga vendi i ngjarjes tregojnë fëmijë të plagosur në tokë mes bidonëve plastikë, teksa të afërmit përpiqen t’i ndihmojnë. BBC konfirmoi vendndodhjen e saktë pranë një shkolle 80 metra larg, afër një çerdheje.
Sipas Mbrojtjes Civile të Gazës, të paktën 19 palestinezë të tjerë humbën jetën të dielën në tre sulme të tjera ajrore ndaj ndërtesave banimi në qytetin e Gazës dhe në pjesën qendrore të territorit.
Komiteti Ndërkombëtar i Kryqit të Kuq deklaroi se spitali i tij fushor në Rafah ka trajtuar më shumë raste të viktimave në gjashtë javët e fundit sesa gjatë gjithë vitit të kaluar. Vetëm të shtunën, 132 pacientë me plagë nga armët u dërguan në spital – 31 prej tyre ndërruan jetë.
Shumica e të plagosurve kishin plagë me armë zjarri dhe, sipas ICRC, të gjithë ishin duke kërkuar ndihma ushqimore në momentin e sulmit. Që prej 27 majit, kur u hapën pikat e reja të shpërndarjes së ndihmave, mbi 3,400 palestinezë janë trajtuar dhe më shumë se 250 kanë humbur jetën.
Të shtunën, 24 persona të tjerë u vranë pranë një zone ndihmash në jug të Gazës. Dëshmitarët raportuan se forcat izraelite hapën zjarr ndaj turmës që po tentonte të merrte ushqime. Ushtria izraelite tha se nuk ka të dhëna për të plagosur dhe se ishin qëlluar vetëm të shtëna paralajmëruese.
OKB njoftoi se ka regjistruar 789 viktima pranë zonave të ndihmave. Prej tyre, 615 vdekje ndodhën pranë qendrave të kontrolluara nga Fondacioni Humanitar i Gazës, i mbështetur nga SHBA dhe Izraeli. Pjesa tjetër ndodhi afër karvanëve të OKB-së dhe organizatave të tjera.
Izraeli nisi ofensivën në Gaza pas sulmit të 7 tetorit nga Hamasi, ku 1,200 njerëz humbën jetën dhe 251 u rrëmbyen. Deri më tani, mbi 57,000 palestinezë janë vrarë, sipas Ministrisë së Shëndetësisë të kontrolluar nga Hamasi. Infrastruktura jetike është shkatërruar dhe popullsia është zhvendosur disa herë.
Vetëm këtë javë, për herë të parë pas 130 ditësh, u lejuan në Gaza 75,000 litra karburant – sasi të pamjaftueshme për nevojat ditore. Nëse mungesa vazhdon, do të paralizojë spitalet, furnizimin me ujë, kanalizimet dhe furra buke, paralajmëruan në një deklaratë të përbashkët nëntë agjenci të OKB-së.
