Delvina u përball me një tornado që dëmtoi kosheret e bletëve pak ditë përpara shpërthimit të zjarreve dhe rriti frikën e banorëve lokalë.
Delvina ka kaluar një periudhë të rëndë këto ditë, e goditur fillimisht nga erërat e fuqishme që krijuan një tornado dhe më pas nga flakët e mëdha. Ky kombinim i dyfatkeqësive natyrore i ka bërë ditët e fundit të padurueshme për banorët.
Ngjarja e tornados ndodhi vetëm pak ditë para se të shpërthenin zjarret. Sipas banorëve, për disa çaste era mori një formë rrotulluese të frikshme, duke dëmtuar disa kosherë bletësh dhe duke lënë njerëzit e pranishëm të habitur.
Pamjet e publikuara tregojnë momentet kur era kalon me shpejtësi mes fshatit, duke marrë gjithçka përpara dhe duke krijuar vorbullën tipike të një tornadoje. Fatmirësisht, ngjarja nuk shkaktoi lëndime njerëzore, por dëmet materiale ishin të dukshme.
Banorët që ndodheshin në vendin e ngjarjes u tronditën nga forca e natyrës. Ata rrëfejnë se tornadoja kaloi aq pranë tyre sa i la të gjithë pa fjalë dhe me ndjenjën e pasigurisë për çfarë mund të ndodhte më tej.
Pas këtij episodi, Delvina u përball edhe me flakët që përfshinë zonën, të nxitura nga era e fortë dhe temperaturat përvëluese. Përhapja e shpejtë e zjarreve e bëri jashtëzakonisht të vështirë neutralizimin e tyre.
Ky kombinim i rrallë i fatkeqësive natyrore ka shtuar ndjeshëm presionin mbi banorët dhe autoritetet lokale, të cilët tashmë po kërkojnë mënyra për të përballuar pasojat e rënda që lanë pas tornadoja dhe zjarret.
