Drejtuesi politik i Partisë Demokratike për qarkun e Beratit, Enno Bozdo, mbajti një fjalim të fortë gjatë tubimit të organizuar nga PD në Athinë, ku theksoi rëndësinë e regjistrimit të votuesve dhe mobilizimit të mbështetësve për zgjedhjet e 11 majit.
Bozdo apeloi për angazhim të plotë të diasporës shqiptare, duke nënvizuar se ky është një moment kyç për të ndryshuar të ardhmen e Shqipërisë.
Në fjalën e tij, ai theksoi se Shqipëria ka vetëm 80 ditë për të arritur një fitore të jashtëzakonshme që do të ndryshonte rrjedhën e historisë. Sipas tij, ky është momenti i fundit për të luftuar kundër krimit dhe narko-shtetit që po dëmton imazhin dhe zhvillimin e vendit.
“80 ditë na ndajnë nga një fitore që do të sjellë një Shqipëri të re, të pastër nga krimi dhe e gatshme për t’u integruar në Bashkimin Europian”, u shpreh Bozdo. Ai shtoi se regjistrimi i votuesve është hapi i parë për të realizuar këtë objektiv, duke bërë thirrje që asnjë shqiptar të mos humbasë mundësinë për të kontribuar në këtë proces historik.
Bozdo gjithashtu e theksoi rëndësinë e një Shqipërie që t’i përkasë Europës dhe që të lërë pas të kaluarën e errët të kriminalitetit. “Ka vetëm 80 ditë për të ndryshuar Shqipërinë dhe për t’i dhënë mundësinë popullit të vendosë për një të ardhme më të sigurt dhe të ndritur”, tha ai.
Ai ftoi të gjithë shqiptarët që jetojnë jashtë vendit të regjistrohen për të votuar dhe të angazhohen në këtë betejë për ndryshimin. “Mundësia është këtu, regjistrohuni që më 11 maj të votojmë për një Shqipëri të pastër, për një Shqipëri blu dhe europiane”, theksoi Bozdo.
Në këtë kontekst, ai vuri theksin në faktin se kjo është mundësia e duhur për të nxjerrë Shqipërinë nga gjendja aktuale dhe për t’i dhënë fund ndikimit të grupeve kriminale në qeverisje. Regjistrimi i votuesve është një hap i domosdoshëm që do të mundësojë një përfaqësim të drejtë të popullit shqiptar në zgjedhjet e ardhshme.
Bozdo mbylli fjalimin e tij me një apel të fuqishëm: “Mos e humbni këtë mundësi! Regjistrohuni, sepse Shqipëria ka nevojë për ju. Vetëm së bashku mund të arrijmë fitoren dhe të ndryshojmë destinacionin e këtij vendi për brezat që do të vijnë.”
