Një elektriçist ka humbur jetën këtë të diel në fshatin Gështenjas të Pogradecit, teksa ishte duke riparuar një defekt në rrjetin elektrik.

Viktima është identifikuar si 60-vjeçari Agim Beqiri, i cili, sipas të dhënave paraprake, ka rënë në kontakt me rrymën elektrike gjatë kryerjes së detyrës, duke pësuar dëmtime fatale.

Pavarësisht ndërhyrjes së menjëhershme, 60-vjeçari nuk ka mundur t’u mbijetojë plagëve.

Menjëherë pas ngjarjes, në vendngjarje mbërritën shërbimet e Policisë dhe grupi hetimor, të cilët nisën veprimet procedurale për dokumentimin e plotë të rastit dhe sqarimin e rrethanave të aksidentit.

Autoritetet po vijojnë hetimet për të përcaktuar shkaqet e plota të ngjarjes.