Eksodi masiv i shqiptarëve drejt vendeve të huaja ka pasur ndikim të thellë në tregun e punës dhe zhvillimin ekonomik të vendit, ishte hapja e këtij episodi nga gazetari Sulejmani.
Nëse një pjesë e të rinjve do të kishin qëndruar në Shqipëri, vendi sot do të kishte një fuqi punëtore të konsiderueshme. Aktualisht, diaspora shqiptare renditet e treta në botë në raport me popullsinë e vendit, duke përfaqësuar një potencial të madh për prosperitetin e Shqipërisë.
E pyetur për rolin e diasporës në zhvillimin e vendit, ekspertja e mjekësisë Aurora Dollenberg nënvizoi rëndësinë e kthimit të mjekëve dhe profesionistëve të shëndetësisë në Shqipëri. Sipas saj, rreth 7000 mjekë janë larguar nga vendi gjatë viteve të fundit, një humbje e madhe që mund të rikuperohet përmes politikave të mirëkoordinuara.
“Bluzat e bardha mund të japin shumë për Shqipërinë nga pikëpamja profesionale, por hapi i parë duhet të jetë lehtësimi i rrugëve institucionale për rikthimin e tyre,” theksoi Dollenberg. Sipas saj, krijimi i mekanizmave që lehtësojnë integrimin e tyre në sistemin shëndetësor do të ndihmonte në përmirësimin e shërbimeve dhe në mbrojtjen e të drejtave të tyre profesionale.
Dollenberg, e cila ka një përvojë të gjatë në mjekësinë jashtë vendit, sugjeron se politika duhet të luajë një rol kyç në këtë proces. “Unë si mjeke jam plotësisht apolitike, por mendoj se vendimmarrja kalon përmes politikës,” tha ajo, duke shtuar se diaspora mund të kontribuojë në mënyrë të drejtpërdrejtë edhe në nivel parlamentar për të përfaqësuar interesat e shqiptarëve jashtë vendit.
Një tjetër hap i rëndësishëm, sipas ekspertes, është forcimi i marrëdhënieve ndërinstitucionale, veçanërisht në sektorin e sigurimeve shëndetësore. Krijimi i një sistemi shëndetësor të qëndrueshëm dhe funksional kërkon bashkëpunim mes institucioneve vendase dhe përfshirjen aktive të ekspertëve të diasporës.
E pyetur për arsyet që do ta bënin të kthehej në Shqipëri, Dollenberg u shpreh se rikthimi do të ishte i mundur vetëm nëse ofrohen kushte të ngjashme me ato të vendeve perëndimore. “Rroga nuk duhet të jetë e barabartë, por e ngjashme, dhe mbi të gjitha, duhet të kemi pajisje dhe infrastrukturë moderne,” tha ajo, duke nënvizuar rëndësinë e standardeve të larta në ofrimin e shërbimeve shëndetësore.
Në përfundim, Dollenberg theksoi se kthimi i mjekëve dhe profesionistëve të tjerë të diasporës nuk është vetëm një çështje personale, por një domosdoshmëri për zhvillimin e qëndrueshëm të Shqipërisë.
