Ela dhe Rozina Dhimaku nga Kopaçeza humbën jetën pas përplasjes së makinës së tyre me një “Audi” në aksin Sarandë-Delvinë.
Një aksident i rëndë rrugor ka tronditur mbrëmjen e sotme zonën pranë Sarandës, ku dy motra nga fshati Kopaçezë i Bashkisë Delvinë kanë humbur jetën tragjikisht. Viktimat janë identifikuar si Ela Dhimaku, e cila drejtonte automjetin, dhe motra e saj, Rozina Dhimaku, pasagjere.
Në makinë udhëtonte edhe shoqja e tyre, Antonela Zhupa, e cila ka mbetur e plagosur rëndë. Sipas të dhënave të para, automjeti ku ndodheshin tre vajzat është përplasur me një mjet tip “Audi” që dyshohet se lëvizte me shpejtësi të madhe.
Forcat e policisë, ekipet e ambulancës dhe zjarrfikësja kanë mbërritur menjëherë në vendngjarje, ndërsa mjekët kanë bërë të pamundurën për të ndihmuar të mbijetuarën.
E plagosura është transportuar me urgjencë drejt spitalit të Sarandës dhe ndodhet në gjendje kritike për jetën.
Hetuesit po punojnë për të zbardhur rrethanat e plota të aksidentit, ndërsa ende nuk ka informacion zyrtar mbi shkaqet e sakta të përplasjes fatale.
Ngjarja ka shkaktuar dhimbje dhe tronditje të madhe në komunitetin e Kopaçezës, ku viktimat njiheshin për karakterin e tyre të qetë dhe miqësor.
