Një 15 vjeçar u plagos rëndë me thikë pranë zemrës gjatë një konflikti mes disa gjimnazistëve në Durrës. I mituri mbërriti në Spitalin Rajonal të Durrësit në gjendje tepër kritike, duke kërkuar ndërhyrje të menjëhershme kirurgjikale.
Sipas njoftimit zyrtar të spitalit, mjekët konstatuan se zemra e të miturit kishte dy çarje nga dy centimetra, të shoqëruara me tamponadë kardiake, si dhe një çarje tre centimetra në stomak, duke e vendosur pacientin në rrezik të menjëhershëm për jetën.
“Pacienti mbërriti në urgjencë në gjendje tejet kritike, me plagë të shumta penetruese dhe organe të dëmtuara nga mjeti prerës. Ekipi kirurgjikal realizoi një ndërhyrje të vështirë, ku u menaxhuan dëmtimet jetike dhe u rikthye stabiliteti hemodinamik,” thuhet në njoftimin e spitalit.
Falë ndërhyrjes së kirurgëve F. Shini dhe E. Demiraj, si dhe anestezistit A. Banushi, operacioni u krye me sukses, duke stabilizuar gjendjen e 15 vjeçarit.
Aktualisht, i mituri po trajtohet në Reanimacion, në gjendje të stabilizuar, ndërsa vijon monitorimi i kujdesshëm i parametrave jetësorë.
