Lëvizja “Bashkë” ka zhvilluar një protestë para Kuvendit të Shqipërisë, duke shënuar protestën e tretë të kësaj force politike të mbajtur para institucioneve qendrore.

Protestës iu bashkuan mbështetës të shumtë, të cilët mbanin pankarta me thirrjen “Dorëzoni Belindën”. Organizatorët e protestës e lidhën aksionin qytetar me akuzat për korrupsion dhe me, sipas tyre, varfërimin e qytetarëve.

Gjatë fjalës së mbajtur para protestuesve, kreu i Lëvizjes “Bashkë”, Arlind Qori, deklaroi se protesta përfaqëson një reagim qytetar kundër korrupsionit dhe qeverisjes aktuale. Ai theksoi se qytetarët janë mbledhur për të kundërshtuar padrejtësinë sociale dhe ekonomike.

“Sot kam zgjedhur të flas për të ardhmen që ne si shoqëri kemi forcën ta përfytyrojmë”, u shpreh Qori gjatë fjalimit të tij, duke theksuar rëndësinë e angazhimit qytetar për ndryshim.

Protesta u zhvillua paralelisht me zhvillimet politike në Kuvend, duke reflektuar klimën e tensionuar politike dhe sociale të ditës.