Mesfushori Arsid Kruja, i cili ka mbyllur kontratën me Teutën, është shumë pranë kalimit te Dinamo, ndërsa vendimi përfundimtar pritet në ditët në vijim.
Arsid Kruja është një nga emrat më të përfolur të merkatos së verës, pasi mesfushori shkodran mund të largohet nga Teuta dhe t’i bashkohet Dinamos. Lojtari nuk ka arritur ende një marrëveshje për rinovim me durrsakët, duke lënë të hapur çdo mundësi për të ardhmen e tij, si qëndrimin në Durrës ashtu edhe një aventurë të re në kryeqytet.
Gjatë sezonit të kaluar, Kruja ishte një nga lojtarët më të rëndësishëm të Teutës, duke u shquar për kontributin në mesfushë dhe në fazat vendimtare të lojës. Pas përfundimit të kontratës me Teutën, interesimi për të është shtuar edhe nga ekipe të tjera, ku Dinamo e Tiranës shfaqet si më e interesuara.
Burime pranë klubit kryeqytetas tregojnë se Dinamo po kërkon të përforcojë krahun e djathtë të mesfushës dhe të mbrojtjes, ku Kruja shihet si profili i duhur për të plotësuar kërkesat e trajnerit Daja. Deri më tani, janë zhvilluar bisedime mes palëve, por mesfushori ende nuk ka dhënë një përgjigje përfundimtare, duke preferuar të shqyrtojë të gjitha opsionet.
Në fundjavë pritet që Arsid Kruja të takohet edhe me drejtuesit e Teutës për të diskutuar mundësinë e një rinovimi të mundshëm, por gjithashtu në tryezë qëndron edhe oferta e Dinamos, që duket mjaft joshëse për lojtarin 31-vjeçar.
Dinamo, nga ana e saj, ka pasur vështirësi në krahun e djathtë të mbrojtjes gjatë sezonit të fundit, pavarësisht përpjekjeve të Meksit. Për këtë arsye, drejtuesit e klubit besojnë se Kruja do të sillte stabilitet dhe eksperiencë në skuadër.
Përveç eksperiencës me Teutën, Kruja ka qenë pjesë e ekipeve të njohura si Laçi, Vllaznia dhe Flamurtari, duke krijuar një profil të rëndësishëm në futbollin shqiptar. Zhvillimet e reja rreth të ardhmes së tij priten të marrin formë gjatë ditëve në vijim, ndërsa Dinamo dhe Teuta mbeten në garë për shërbimet e tij.
