Konstituimi i Kuvendit të Kosovës dështon për herë të 51-të, ndërkohë që afati ligjor po shkon drejt fundit me vetëm tri ditë të mbetura.
Për herë të 51-të radhazi, Kuvendi i Kosovës nuk arriti të konstituohet, duke thelluar kështu krizën politike në vend. Afati 30-ditor i dhënë nga Gjykata Kushtetuese për përmbushjen e këtij obligimi po shkon drejt fundit, ndërsa tashmë kanë mbetur vetëm tri ditë për zgjidhje.
Seanca e fundit u ndërpre nga kryesuesi Avni Dehari, i cili njoftoi se kushtet për vazhdimin e saj nuk ishin të pranueshme. Ngjarjet u tensionuan më tej kur deputetja e Partisë Demokratike të Kosovës, Ganimete Musliu, i hoqi mikrofonin kryesuesit gjatë debatit. Kjo situatë u shkaktua pasi Dehari nuk i lejoi asaj të diskutonte për pika jashtë rendit të ditës.
Në përpjekje për të kaluar procedurat, kryesuesi Dehari propozoi votimin për Komisionin e votimit të fshehtë, një mënyrë votimi që po përkrahet kryesisht nga partia Vetëvendosje. Kjo e fundit kërkon votim të fshehtë pasi në votimin e hapur nuk arriti të siguronte zgjedhjen e Albulena Haxhiut si kryeparlamentare.
Megjithatë, edhe ky përpjekje dështoi, pavarësisht se Vetëvendosje me 48 deputetë dhe Nisma me 3 deputetë kanë nisur negociata për një marrëveshje që do t’i mundësonte vendit krijimin e institucioneve, të cilat mungojnë prej afro pesë muajsh pas zgjedhjeve.
Situata mbetet e paqartë dhe e tensionuar, duke vënë në pikëpyetje stabilitetin politik të Kosovës dhe procesin e krijimit të institucioneve të reja. Afati i fundit po afrohet, por konsensusi duket larg arritjes.
