Debati për Rrugën e Arbrit u kthye në sulme personale mes dy deputetëve të qarkut Dibër, Denisa Vata të PD-së dhe Agron Malajt të PS-së. Në përgjigje të deklaratës së Vatës se rritja e kostove të Rrugës së Arbrit është shpifje, Malaj kaloi në sulme personale duke kërkuar ironikisht falje për cilësinë e deputetes që demokratët kanë sjellë në parlament. Ai vijoi duke thënë se ajo nuk ka ardhur nga votat e Matit, por nga votat e listës së mbyllur.
“Të thuash që ka ndryshim të vlerës në Rrugën e Arbrit, kjo është një shpifje dhe gënjeshtër, siç dinë ta bëjnë kjo parafolësja, ku duhet t’i kërkoj ndjesë të gjithë kolegëve për cilësinë e deputetes që keni sjellë në parlament. Por që nuk ka ardhur nga votat e Matit, por ka ardhur nga votat e listës së mbyllur me padashje. Parafolësja duhet të kuptojë diçka: sa herë ka zgjedhje humb dhe humb me rezultate në çdo zgjedhje më të thella. Dhe e di pse? Sepse matjanët as këtë dhe as atë tjetrin që kanë nga mbrapa, bashkë me dibranët, as nuk i kanë në lista, por as nuk i kanë në asnjë lloj plani të tyre”, tha Malaj.
Nga ana tjetër, deputetja demokrate Denisa Vata ia ktheu duke i kërkuar Malajt të shkojë të japë llogari për 21 Janarin dhe mënyrën se si është katapultuar deri në parlament, pasi në atë kohë ishte një nga gardistët që mbronte kryeministrinë. Vata vijoi më tej duke e akuzuar Malajn se, gjatë kohës që drejtonte Bashkinë e Matit, i ka dhënë tendera kompanisë 5D, që drejtohej nga drejtorët e Bashkisë Tiranë dhe që sot është nën hetim nga SPAK, ndërsa në këmbim vëllai i tij merrte tendera nga Bashkia e Tiranës.
“Atëherë, zoti Malaj, në vend se të flasë këtu se me çfarë votash kam ardhur unë, në fakt duhet të japë llogari për ngjarjet e 21 janarit. Është pikërisht ai që duhet të japë llogari dhe ju sot e keni sjellë në parlament. Gjithashtu Agron Malaj duhet të japë llogari këtu jo me çfarë votash kam ardhur unë, por me çfarë parash ka ndërtuar vëllai i tij hotelin ‘Labëria’ në Dhërmi, në ish-kampin e fëmijëve në Dhërmi. Dhe ku i mori paratë. Ndërkohë zoti Malaj duhet të japë llogari pse vëllai i tij merr tendera në Bashkinë e Tiranës dhe njëkohësisht Agron Malaj, kur ishte kryetar bashkie, i jepte tendera drejtorëve të 5D në Bashkinë e Matit, siç është ai që e kemi paraqitur edhe për ndërtimin e kanaleve të ujërave të zeza. Këto janë ato që duhet të japë llogari zoti Malaj, jo se kë votojnë demokratët dhe kë preferojnë demokratët”, tha Denisa Vata.
