Viti 2025 pritet të mbyllet me 284 milionë lekë shpenzime për dëmshpërblime ndaj punonjësve të larguar ose pushuar padrejtësisht nga puna. Për periudhën 2026–2028 parashikohet ekzekutimi i detyrimeve për tre vite të tjera, me një vlerë shtesë prej 870 milionë lekësh – rreth 9 milionë euro.
Në total, fatura e dëmshpërblimeve për periudhën 2025–2028 arrin në rreth 1.1 miliard lekë, afërsisht 12 milionë euro. Të dhënat vijnë nga “Programi buxhetor afatmesëm 2026–2028”.
Gjatë viteve 2026–2028 pritet të ekzekutohen pagesat për 425 vendime gjyqësore, me një vlerë totale prej 870 milionë lekësh. Dëmshpërblimi për çdo vendim llogaritet nga 1.9 deri në 2.2 milionë lekë.
- Viti 2026: parashikohet ekzekutimi i 145 vendimeve, me kosto totale 300 milionë lekë (2.2 milionë lekë për vendim).
- Viti 2027: parashikohen 270 milionë lekë për 140 vendime (1.9 milionë lekë për vendim).
- Viti 2028: pritet ekzekutimi i pagesave për 140 vendime të tjera, gjithashtu me një kosto totale prej 270 milionë lekësh (1.9 milionë lekë për vendim).
Vetëm për vitin 2025, Ministria e Financave parashikon 284 milionë lekë për ekzekutimin e vendimeve të formës së prerë në rastet e largimeve të padrejta nga puna.
Nga viti 2015 deri në 2023 janë paguar rreth 13 miliardë lekë (130 milionë euro) për dëmshpërblime të këtij lloji. Viti me shpenzimet më të larta rezultoi 2017, me 1.8 miliardë lekë të paguara.
Pjesa më e madhe e faturës i përket administratës qendrore, e cila për periudhën 2015–2022 ka paguar 9.9 miliardë lekë. Pushteti vendor për të njëjtën periudhë ka paguar 2.2 miliardë lekë. Ndër bashki, vitet me shpenzimet më të larta qenë 2016 dhe 2022, kur dëmshpërblimet arritën respektivisht 315.5 milionë dhe 324.6 milionë lekë.
Një nga shkaqet e rritjes së vazhdueshme të faturës është stoku i dosjeve të prapambetura, ku shpesh tejkalohet afati i arsyeshëm i gjykimit prej tre vitesh. Deri në vitin 2023, në Gjykatën Administrative të Apelit ishin 23,140 çështje, nga të cilat rreth 13% lidhen me marrëdhëniet e punës.
