Fermerët e Divjakës dhe Lushnjes mbajnë në këmbë furnizimin me shalqi, pjepër, qepë dhe patate, ndërsa çmimet për eksport janë thuajse identike me ato të tregut vendas
Në mes të sezonit të verës, fermerët e zonës së Divjakës janë kthyer në mbështetësit kryesorë të tregut vendas për prodhimet bujqësore si shalqini, pjepri, qepa dhe patatja. Këto produkte po furnizojnë jo vetëm tregjet lokale, por edhe ato kombëtare me cilësi dhe sasi të larta.
Sipas të dhënave të mbledhura në tregun e fruta-perimeve në Divjakë, një kilogram shalqi i cilësisë së parë shitet me çmim që varion nga 20 deri në 22 lekë të reja. Pjepri tregtohet me 50 deri në 60 lekë për kilogram, ndërsa çmimi për qepë dhe patate është i njëjtë, rreth 50 lekë për kilogram, raporton gazetarja Mukades Dervishi.
Në këtë periudhë, në territorin e Divjakës dhe Lushnjes funksionojnë 27 pika grumbullimi që janë fokusuar tërësisht në eksportin e këtyre produkteve kryesore. Pavarësisht vëmendjes ndaj eksportit, prodhimi i perimeve të tjera si domatja, trangulli, speci dhe patëllxhani mbështetet nga tregu vendas dhe tërhiqet direkt nga fermerët nga tregtarët lokalë.
Nga një vëzhgim i kryer sot në terren, u konstatua se çmimet për eksport janë pothuajse identike me ato të tregut të brendshëm, gjë që tregon një stabilitet të dukshëm të tregut dhe një balancë mes kërkesës dhe ofertës.
Fermerët vijojnë të punojnë në mënyrë intensive për të përmbushur kërkesat e tregut, ndërkohë që Divjaka mbetet një nga zonat më aktive në sektorin bujqësor për prodhime të stinës, me një prani të ndjeshme në zinxhirin furnizues kombëtar dhe ndërkombëtar.
Përpos sfidave të zakonshme në sektor, fermerët e zonës po arrijnë të ruajnë ritmet e prodhimit dhe të vazhdojnë eksportin, duke mbajtur kështu gjallë ekonominë bujqësore të rajonit.
