Pavarësisht uljes së dukshme të çmimeve të karburanteve në Bashkimin Europian, tregu shqiptar ka mbetur i pandryshuar, duke ngritur pikëpyetje mbi konkurrencën reale.
Banka e Shqipërisë ka vënë në dukje se ulja e çmimeve të karburanteve në vendet e BE-së gjatë tremujorit të dytë, sidomos në maj, nuk është reflektuar në tregun vendas. Në raportin e politikës monetare theksohet se çmimet në pikat e shitjes me pakicë në Shqipëri kanë mbetur të pandryshuara që prej vitit të kaluar.
Sipas të dhënave, tregu vendas nuk po pasqyron më as luhatjet afatshkurtra të çmimit të naftës bruto dhe as ndryshimet në kursin e këmbimit. Aktualisht, nafta në tregjet ndërkombëtare tregtohet rreth 66 dollarë për fuçi, një rënie prej mbi 18% krahasuar me një vit më parë.
Rënia e çmimit të naftës përkon edhe me dobësimin e dollarit amerikan, i cili ka zbritur në rreth 83 lekë, më pak se 8% nga niveli i vitit të kaluar. Megjithatë, këto zhvillime nuk kanë sjellë ulje në çmimet e pompës në Shqipëri.
Në fillim të luftës në Ukrainë, tregu vendas përjetoi rritje të menjëhershme e të shpeshta të çmimeve, në disa raste edhe brenda ditës. Për të frenuar situatën, qeveria ngriti Bordin e kontrollit të çmimeve, i cili u shfuqizua pasi tregjet ndërkombëtare u stabilizuan.
Edhe pas heqjes së Bordit, konkurrenca në tregun e karburanteve duket e dobët. Ndryshimet e çmimeve ndodhin rrallë dhe shpesh në mënyrë të njëkohshme në të gjitha pikat e shitjes. Kjo ngre dyshime mbi një funksionim të lirë të tregut.
Tregu i karburanteve ka një përqendrim të madh në import dhe tregtinë me shumicë. Edhe pse Autoriteti i Konkurrencës ka kryer disa herë hetime, asnjëherë nuk ka konstatuar shkelje të ligjit për mbrojtjen e konkurrencës. Hetimi më i fundit është mbyllur në fund të vitit 2022.
