Si sot, 80 vite më parë, Tirana u çlirua nga pushtuesit nazifashistë, një ngjarje historike që shënoi fundin e një periudhe të errët për Shqipërinë.
Ky moment është cilësuar si një prej operacioneve më të mëdha, më të ashpra dhe më të suksesshme të realizuara nga njësitë e Ushtrisë Nacionalçlirimtare Shqiptare (UNÇSH) në luftën kundër forcave gjermane dhe bashkëpunëtorëve të tyre.
Operacioni për çlirimin e kryeqytetit iu besua Korpomatës së I Sulmuese, e cila hartoi një plan të detajuar për të siguruar çlirimin e Tiranës. Plani operativ, i bazuar në strategjitë e Komandës së Përgjithshme, parashikonte krijimin e dy fronteve: një të brendshëm dhe një të jashtëm, me qëllim mbylljen dhe goditjen e garnizonit gjerman që ndodhej brenda qytetit.
Operacioni u realizua në tre faza kryesore: faza përgatitore (12 shtator – 28 tetor), faza e parë e sulmit (29 tetor – 10 nëntor) dhe faza e sulmit përfundimtar (11 – 17 nëntor). Gjatë këtyre 19 ditëve, zhvilluan luftëra të ashpra në qytet dhe në rrugët që çonin drejt tij. Lufta për çlirimin e Tiranës ishte një betejë ballore, që tregoi shkallën e lartë të organizimit të UNÇSH dhe sakrificat e jashtëzakonshme të ushtarëve dhe popullit.
Më 17 nëntor, pas ditësh të tëra luftimesh, Tirana u çlirua, dhe kjo fitore përfaqëson një moment të madh për historinë e Shqipërisë. Në këtë fitore, beteja e Mushqetasë luajti një rol të veçantë, duke kontribuar në kthesën e operacionit. Lufta për çlirimin e Tiranës kishte një karakter të vërtetë ballor, ku lufta ishte e ashpër dhe e pa kompromis.
Një kontribut të jashtëzakonshëm në këtë operacion dha edhe populli i Tiranës, i cili mbështeti fuqimisht Luftën Nacionalçlirimtare, duke u angazhuar në mbështetje të luftëtarëve dhe duke marrë pjesë në përpjekjet për çlirimin e qytetit. Qytetarët e Tiranës, të udhëhequr nga ndjenja e fortë e patriotizmit, u bënë pjesë e një lufte që do të mbahet mend për gjithë historinë e Shqipërisë.
Ky çlirim, i cili erdhi pas një periudhe të gjatë vuajtjesh dhe sakrificash, është një kujtim i përjetshëm i forcës dhe unitetit të popullit shqiptar në luftën për liri. Çlirimi i Tiranës, si një moment historik, është i lidhur ngushtë me historinë e Luftës Nacionalçlirimtare dhe është një simbol i qëndresës dhe guximit të popullit shqiptar për të luftuar për të drejtat dhe liritë e tij.
