Këngëtarja e njohur Çiljeta Xhilaga ka një arsye të veçantë për të festuar sot, pasi përveç ditëlindjes së saj, shënon edhe ditëlindjen e djalit të saj, Fernando.
Këngëtarja dhe i biri ndajnë të njëjtën datë të lindjes, duke e bërë këtë ditë akoma më të veçantë për të dy.
Në këtë përvjetor, Çiljeta mbush 40 vjeç, ndërsa Fernando feston 12-vjetorin e tij. E emocionuar, ajo ka ndarë me ndjekësit në rrjetet sociale momente të bukura nga kjo ditë, duke postuar disa fotografi me djalin e saj mes shumë buqetash me lule.
“Ne të dy shpirtra binjakë. Gëzuar ditëlindjen për ne,” ka shkruar këngëtarja në një nga postimet e saj, duke treguar lidhjen e fortë mes tyre. Mesazhi i saj është pritur me urime të shumta nga miqtë dhe fansat.
Prej disa kohësh, Çiljeta kishte qëndruar larg skenës dhe ekranit, por së fundmi është rikthyer në vëmendje përmes pjesëmarrjes në spektaklin “Ferma VIP”. Prezenca e saj në këtë format ka rikthyer interesin e publikut për të, duke e vënë sërish në qendër të mediave rozë.
E njohur për stilin e saj unik dhe personalitetin karizmatik, Çiljeta ka qenë gjithmonë një nga emrat më të pëlqyer të muzikës shqiptare. Edhe pse ka pasur periudha shkëputjeje nga muzika, ajo vazhdon të mbetet një figurë e dashur për publikun.
Ditëlindja e saj këtë vit duket se ka qenë më e veçantë se kurrë, pasi e ka ndarë gëzimin me personin më të shtrenjtë për të, djalin e saj. Urimet dhe surprizat nuk kanë munguar, duke e bërë këtë një ditë të paharrueshme për të dy.
