Me fillimin e vitit 2025, Champions League rikthehet më i madh se kurrë, duke sjellë një format të ri dhe shumë emocione të paprovuara deri më tani.
Dy raundet e fundit të fazës së grupeve, që do të zhvillohen të martën dhe të mërkurën, do të përcaktojnë fatet e 36 skuadrave pjesëmarrëse. Ndërkohë, tre skuadra të tjera, Slovan Bratislava, Young Boys dhe Leipzig, janë të eleminuara dhe do të luajnë vetëm për prestigj, në përpjekje për të mos mbyllur fazën pa pikë.
Në këto dy ditë, shumë ekipe do të kërkojnë fitoren e nevojshme për të siguruar kalimin në raundin tjetër. Liverpool është skuadra e vetme që ka mbledhur pikë të plota deri tani dhe do të presë Lille-n në “Anfield” të martën, për të vazhduar fitoren dhe për të siguruar kualifikimin. Barcelona, pas një ndalese në kampionat, do të udhëtojë në Lisbonë për t’u përballur me Benficën dhe për të kërkuar rikthimin te fitorja.
Në Itali, Juventus dhe Milan janë dy skuadrat që duhet të kërkojnë me çdo kusht tre pikët. Të dyja këto ekipe e dinë se vetëm një fitore mund t’i mbajë në garë për kalimin në fazën tjetër. Ndërkohë, Inter do të udhëtojë të mërkurën drejt Pragës për të luajtur ndaj Spartës, ku do të duhet të fitojë për të siguruar vendin në fazën e eliminimit direkt, pasi kanë fatin e tyre në duar: dy fitore ndaj Sparta Pragës dhe Monaco do t’i dërgonin drejt këtij objektivi.
Një tjetër skuadër që kërkon sukses është Bayerni i Mynihut, që do të udhëtojë drejt Roterdamit për të përballur Feyenoordin. Për bavarezët, çdo gabim mund të kushtojë shumë, ndërsa të tjera skuadra si PSG dhe Manchester City do të përballen në një nga duelit më të forta të raundit të 7, me shpresën se do të mbeten në garë për kualifikim. Sidomos parizienët janë në një pozicion delikat, pasi një humbje mund t’i largonte më tej nga objektivi i Champions League.
Në këtë fazë, është e qartë se çdo ndeshje ka rëndësi të jashtëzakonshme. Pas 8 raundeve të fazës së grupeve, 8 skuadrat e para do të kalojnë drejtpërdrejt në raundin e 1/8, ndërsa skuadrat nga vendi i 9 deri në të 24 do të kalojnë në Play Off, ku do të përballen për të siguruar një vend në fazën me eliminim direkt.
Shanset janë të barabarta, dhe ky kompeticion do të vazhdojë të mbajë të gjithë tifozët në tension deri në momentin e fundit të grupit. Secila skuadër ka mundësinë të shkruajë historinë e saj dhe të luftojë për një vend të sigurt në fazat finale të Champions League.
