Klubi kuqezi do të ketë këtë vit një fond të paprecedentë prej 5 milionë euro, duke synuar rikthimin në elitë dhe investime madhore në infrastrukturë.
Flamurtari do të nisë sezonin e ri me një buxhet historik prej 5 milionë eurosh, një shumë që tashmë është miratuar nga bordi drejtues dhe administratori Sinan Idrizi. Ky fond, më i madhi në historinë e klubit vlonjat, synon jo vetëm përforcimin e skuadrës, por edhe transformimin e plotë të kushteve të punës për lojtarët.
Një pjesë e konsiderueshme e buxhetit do të përdoret për rinovimin e stadiumit, ku po zhvillohet një projekt i gjerë rikonstruksioni. Investimet në infrastrukturë janë prioritet, duke përfshirë modernizimin e ambienteve, fushës dhe kushteve teknike që do t’i japin ekipit standarde bashkëkohore.
Përtej investimeve në stadium, klubi ka parashikuar fonde të mëdha për kontratat e lojtarëve, bonuset e performancës, trajtimin ushqimor, akomodimin gjatë transfertave dhe qiratë e banesave. Idrizi ka theksuar se këtë sezon objektivi nuk është thjesht pjesëmarrja, por ndërtimi i një skuadre konkurruese dhe të motivuar.
Politika e shpërblimeve ka ndryshuar ndjeshëm. Ndryshe nga vitet e kaluara, ku bonuset jepeshin në fund të sezonit, këtë herë ato do të shpërndahen edhe gjatë kampionatit, veçanërisht në ndeshje kyçe ku kërkohet domosdoshmërisht fitorja. Qëllimi është motivimi i vazhdueshëm i futbollistëve dhe mbajtja e një ritmi të lartë gare.
Sezonin e kaluar, edhe pse në Kategorinë e Parë, Flamurtari kishte një buxhet prej 2 milionë eurosh, nga të cilat 1.5 milionë iu dedikuan skuadrës. Pas sigurimit të ngjitjes në Superiore, ekipi shpërndau një bonus prej 100 milionë lekësh për lojtarët, duke treguar se politika e klubit është shpërblyese kur arrihen objektivat.
Ky buxhet rekord i jep Flamurtarit mundësinë të kthehet në një nga skuadrat më të forta të futbollit shqiptar, me ambicien për të rikthyer lavdinë e dikurshme dhe për të forcuar identitetin e tij në elitë.
