Qeveria dhe Banka e Shqipërisë po intensifikojnë përpjekjet për të rritur kreditimin në sektorin e bujqësisë përmes Skemës së Garancisë Sovrane, e cila parashikon kredi me normë interesi të kufizuar në 2% dhe mbulim deri në 70% të vlerës së financimit.
Në një takim të zgjeruar të organizuar nga Ministria e Financave, ku morën pjesë guvernatori i Bankës së Shqipërisë, ministri i Bujqësisë dhe drejtues të bankave tregtare, u diskutua progresi i deritanishëm i skemës dhe mënyrat për rritjen e përthithjes së saj nga fermerët dhe bizneset agro-përpunuese.
Skema e Garancisë Sovrane për bujqësinë, me një fond prej 3 miliardë lekësh (rreth 30 milionë euro), mbështet për herë të parë drejtpërdrejt fermerët dhe ndërmarrjet mikro, të vogla dhe të mesme në sektorin bujqësor.
Garancia shtetërore mbulon deri në 70% të kredisë, me:
- normë interesi maksimal 2%
- periudhë grace minimale 12 muaj
- pa penalitete për shlyerje të parakohshme
Ministri i Financave theksoi se bujqësia mbetet prioritet strategjik, veçanërisht në prag të integrimit ekonomik në tregun e përbashkët europian. Rritja e produktivitetit dhe e vlerës së shtuar përgjatë zinxhirit prodhues kërkon financim të qëndrueshëm dhe instrumente mbështetëse funksionale.
Guvernatori Gent Sejko nënvizoi se skema është konceptuar si instrument plotësues, që përmirëson transmetimin e kreditimit drejt ekonomisë reale, duke ruajtur stabilitetin financiar dhe parimet e menaxhimit të rrezikut.
Sipas të dhënave të sektorit bankar, pas një periudhe fillestare njohjeje me skemën, muajt e fundit është shënuar rritje e aplikimeve nga fermerët dhe bizneset agropërpunuese.
Institucionet pjesëmarrëse riafirmuan angazhimin për koordinim të vazhdueshëm me bankat dhe për orientimin e fermerëve drejt mundësive të financimit, me synim zgjerimin e investimeve dhe rritjen e qëndrueshme ekonomike.
