Pas shpërthimit të murtajës së bagëtive, në Dibër konfirmohet prania e Brucelozës, ndërsa dy familje vendase janë vendosur në izolim për të parandaluar përhapjen
Pas përhapjes së murtajës tek kafshët në zonën e Dibrës, autoritetet kanë konfirmuar një tjetër sëmundje infektive: Brucelozën. Rastet janë regjistruar në njësitë administrative Kastriot dhe Muhurr, ku dy familje janë izoluar për shkak të kontaktit të drejtpërdrejtë me kafshë të infektuara.
Prefekti i Qarkut Dibër, Nexhbedin Shehu, bëri të ditur se situata nuk paraqet rrezik të lartë për komunitetin, pasi masat parandaluese janë marrë menjëherë. Familjet e prekura kanë asgjësuar kafshët shtëpiake që mbartnin virusin Brucella, ndërsa personat që kanë pasur kontakt me ta i janë nënshtruar analizave dhe trajtimit të nevojshëm.
Autoritetet shëndetësore theksojnë se rastet janë të izoluara, por paralajmërojnë banorët që të jenë të kujdesshëm dhe të mos neglizhojnë asnjë simptomë të mundshme. Prefekti Shehu apeloi për vëmendje maksimale dhe bashkëpunim me institucionet mjekësore.
Bruceloza është një sëmundje ngjitëse që përhapet kryesisht përmes konsumit të qumështit të papasterizuar, mishit të papërpunuar apo kontakteve me sekrecionet e kafshëve të infektuara. Ajo prek njerëzit duke shkaktuar simptoma si ethe, të dridhura, djersitje të pakëndshme, dhimbje muskujsh dhe kyçesh, humbje oreksi, lodhje dhe probleme të tjera gastrointestinale.
Simptomat shpesh ngatërrohen me gripin apo infeksione të tjera, gjë që e bën diagnostikimin e hershëm të domosdoshëm për të shmangur përkeqësimin e gjendjes. Në Dibër, shfaqja e Brucelozës pas murtajës ka rikthyer shqetësimin për kontrollin e zinxhirit ushqimor dhe shëndetin veterinar.
Institucionet po punojnë për monitorimin e rasteve të reja dhe ndërgjegjësimin e popullatës, ndërsa theksohet nevoja për respektim të protokolleve të higjienës dhe konsumit të sigurt të produkteve shtazore. Dibranëve u kërkohet të shmangin çdo kontakt me kafshë të dyshuara dhe të lajmërojnë autoritetet në rast të dyshimeve.
