Alarm në Belgjikë pas fluturimeve të paautorizuara të dronëve mbi aeroporte dhe termocentrale bërthamore, ndërsa Mbretëria e Bashkuar dërgon personel për të ndihmuar në mbrojtje ajrore.
Belgjika është përfshirë nga një valë shqetësuese incidentesh ajrore. Të dielën në mbrëmje, Aeroporti i Liège-it, një nga qendrat më të mëdha të transportit të mallrave në Europë, u detyrua të pezullojë aktivitetin për afro një orë pasi u pikasën disa dronë që fluturonin mbi pistë. Ky është episodi i dytë brenda pak ditësh, pas ndërprerjeve të ngjashme në aeroportet e Brukselit dhe Liège-ut.
Në të njëjtën kohë, autoritetet belge kanë konfirmuar praninë e tre dronëve mbi termocentralin bërthamor Doel, pranë Antwerpit. Zëdhënësit e qendrës siguruan se nuk pati pezullime të punës, por theksuan se janë në gatishmëri të plotë për çdo zhvillim të mundshëm.
Rritja e numrit të incidenteve me dronë ka vënë në alarm institucionet evropiane të sigurisë. Javën e kaluar, Ministria gjermane e Mbrojtjes njoftoi se ushtria federale (Bundeswehr) po ndihmon Belgjikën me mbrojtjen ajrore dhe sistemet e zbulimit të dronëve, pasi këto fluturime po konsiderohen si pjesë e një fushate të mundshme “kërcënimesh hibride”.
Në këtë kontekst, Mbretëria e Bashkuar ka dërguar pajisje dhe personel ushtarak për të mbështetur autoritetet belge. Një zëdhënës i ushtrisë britanike konfirmoi se Londra po kontribuon në operacionet e sigurisë me synim neutralizimin e dronëve që rrezikojnë infrastrukturat strategjike.
Sekretari britanik i Mbrojtjes, John Healey, deklaroi se Britania do të qëndrojë pranë aleatit të saj të NATO-s përballë kërcënimeve të reja. Ai theksoi se “bëhet fjalë për një mbrojtje të përbashkët të hapësirës ajrore dhe të infrastrukturës kritike evropiane, në një kohë kur kërcënimet hibride janë në rritje.”
Në javët e fundit, dronët janë pikasur edhe mbi bazën ushtarake Kleine-Brogel, e cila përdoret nga NATO. Raporte të pakonfirmuara sugjerojnë se kjo bazë mund të jetë një nga vendet ku ruhen armët bërthamore amerikane në Evropë, gjë që ka shtuar ndjeshëm shqetësimet e sigurisë.
Belgjika, si seli e NATO-s dhe Bashkimit Evropian, është tashmë një objektiv i ndjeshëm strategjik. Përveç kësaj, kompania financiare Euroclear, me qendër në Bruksel, ruan miliarda euro asete të ngrira nga Perëndimi pas pushtimit rus të Ukrainës, pasuri që shumë vende të BE-së kërkojnë t’i përdorin për të mbështetur financiarisht Kievin.
Autoritetet belge po hetojnë nëse fluturimet e dronëve janë pjesë e një fushate të koordinuar spiunazhi ose provokimi gjeopolitik. Ndërkohë, masa të reja sigurie janë duke u zbatuar mbi hapësirat ajrore dhe objektet bërthamore, me qëllim parandalimin e çdo incidenti të mundshëm.
Kjo seri ngjarjesh ka rikthyer në qendër të debatit evropian nevojën për një strategji të përbashkët mbrojtëse ndaj dronëve, ndërsa Belgjika dhe aleatët e saj kërkojnë të ruajnë integritetin e infrastrukturës më të ndjeshme të kontinentit.
