Tony Blair shihet si kandidat për të udhëhequr Autoritetin Ndërkombëtar Kalimtar të Gazës, me mbështetjen e SHBA-së dhe miratimin e Donald Trumpit.
Tony Blair, ish-kryeministri britanik, po përgatitet të marrë një rol të rëndësishëm në administrimin e Gazës pas përfundimit të luftës. Që nga fundi i gushtit ai ka qenë pjesë e takimeve të nivelit të lartë në Shtëpinë e Bardhë, të organizuara nga Jared Kushner, ish-këshilltar për Lindjen e Mesme dhe figurë e afërt e Donald Trump. Zyrtarë amerikanë kanë lënë të kuptohet se po përgatitet një plan i gjerë për menaxhimin e situatës pas armëpushimit.
Sipas Financial Times, Blair ka marrë mbështetje nga Shtëpia e Bardhë për të kryesuar Autoritetin Ndërkombëtar Kalimtar të Gazës (GITA). Ky organ kolegjial do të marrë përsipër administrimin e enklavës që nga momenti kur luftimeve t’u vijë fundi dhe Hamas të largohet. BBC ka konfirmuar gjithashtu detajet e planit.
Plani i Blair, i ndërtuar përmes konsultimeve me aktorë rajonalë dhe ndërkombëtarë, parashikon një strukturë me rreth dhjetë anëtarë. Aty do të përfshihen një zyrtar i lartë i OKB-së, përfaqësues nga vendet myslimane, ekspertë të njohur ndërkombëtarisht dhe një përfaqësues palestinez me profil teknokrat. Ky konfigurim synon të balancojë interesat ndërkombëtare dhe pjesëmarrjen e Autoritetit Palestinez.
Ndryshe nga projektet më radikale të paraqitura më herët, plani i Blair nuk parashikon zhvendosje të popullsisë së Gazës. Në fakt, ai synon ruajtjen e strukturës shoqërore ekzistuese dhe krijimin e kushteve për stabilitet afatgjatë. Një pjesë e këtyre ideve janë mbështetur nga vetë Instituti Tony Blair për Ndryshim Global, organizata që ai themeloi për të këshilluar qeveri në mbarë botën.
Blair ka përvojë në Lindjen e Mesme, pasi në vitin 2007 u emërua i dërguar i posaçëm i Kuartetit për Lindjen e Mesme. Megjithatë, ai mbart ende mosbesim nga disa vende arabe për shkak të rolit të tij në ndërhyrjen e vitit 2003 në Irak. Nëse emërohet “guvernator” i Gazës, ky do të ishte një zhvillim i bujshëm dhe i diskutueshëm.
As Shtëpia e Bardhë dhe as Instituti Tony Blair nuk kanë reaguar zyrtarisht për këto raportime. Megjithatë, Financial Times thekson se testi real i planit do të jetë takimi i ardhshëm mes Trumpit dhe Benjamin Netanyahut në Uashington. Qëndrimi i kryeministrit izraelit pritet të përcaktojë nëse ky projekt do të gjejë rrugë përpara apo do të mbetet vetëm në letër.
