Takimet mes zyrtarëve të lartë të Shteteve të Bashkuara dhe Rusisë do të zhvillohen në Arabinë Saudite me qëllimin e dhënies fund të luftës së Rusisë në Ukrainë dhe diskutimin e çështjeve të tjera që kanë ngritur tensione midis Uashingtonit dhe Moskës.
Takimi, që do të zhvillohet më 18 shkurt, pason përpjekjet e intensifikuara të administratës amerikane për të ndaluar luftën që ka zgjatur pothuajse tre vjet, edhe pse ka paqartësi për natyrën e mundshme të marrëveshjes që mund të arrihet.
Ky është një hap i parë në një proces negociatash që mund të zgjasin, siç ka thënë Nigel Gould-Davies, ish-diplomat britanik, i cili shpreh se situata është ende shumë e paqartë, por gjërat mund të lëvizin shpejt. Takimet do të synojnë hapjen e mundësisë për një samit të mundshëm mes presidentit amerikan Donald Trump dhe presidentit rus Vladimir Putin, për të diskutuar në nivel më të lartë për përfundimin e luftës dhe çështje të tjera të sigurisë.
Në këto bisedime, Rusia do të përfaqësohet nga Ministri i Jashtëm Sergei Lavrov dhe këshilltari për politikë të jashtme i presidentit Putin, Yury Ushakov. Pjesën amerikane do ta udhëheqë Sekretari i Shtetit Marco Rubio, Këshilltari për Siguri Kombëtare Mike Waltz dhe i dërguari i posaçëm amerikan për Lindje të Mesme, Steve Wikoff. Megjithatë, në këtë delegacion nuk është i përfshirë Keitj Kellogg, i cili ishte dërguar nga Shtëpia e Bardhë për negociatat e mundshme për zgjidhjen e luftës.
Pavarësisht mundësisë për një zgjidhje paqësore, presidenti ukrainas Volodymyr Zelensky ka shprehur dyshime për arritjen e një marrëveshjeje që do të përfshinte Ukrainën, pa pranishmërinë e përfaqësuesve të Kievit në tavolinën e negociatave. Ndërkohë, ai ka konfirmuar se Kellogg do të arrijë në Kiev më 20 shkurt për bisedime mbi sigurinë.
Takimi i Riadit do të shtrihet përtej çështjes së Ukrainës dhe pritet të përfshijë diskutime për marrëdhëniet mes Moskës dhe Uashingtonit, sanksionet, energjinë dhe sigurinë globale. Rubio ka theksuar se, nëse negociatat shkojnë përpara, do të jetë e nevojshme përfshirja e Ukrainës dhe shteteve evropiane për të siguruar një zgjidhje afatgjatë dhe të qëndrueshme.
Ndërkohë, Lavrov ka deklaruar se Rusia nuk është e gatshme të heqë dorë nga territorët që ka pushtuar në Ukrainë, dhe se nuk sheh arsye për përfshirjen e evropianëve në këto negociata. Nga ana tjetër, ekspertët e sigurisë kanë theksuar se një zgjidhje e qëndrueshme do të kërkonte një samit mes liderëve të lartë, si Trump dhe Putin, për të arritur një marrëveshje të detajuar.
Bisedimet e ardhshme përfundimisht mund të përfshijnë edhe vendime për çështje të tjera të rëndësishme, si statusi i Ukrainës dhe mundësia e anëtarësimit të saj në NATO. Në këtë kuadër, zyrtarët amerikanë kanë theksuar se mund të diskutohet një marrëveshje paqeje që do të shmangte një përfshirje të mëtejshme ushtarake amerikane, duke lënë përgjegjësinë për sigurinë te forcat evropiane.
Në këtë kontekst, do të jetë e rëndësishme për të parë se si Rusia dhe SHBA do të arrijnë një balancë për të përfunduar luftën dhe për të ruajtur sigurinë globale, duke u mundësuar shteteve të tjera, si Ukraina dhe vendet evropiane, një rol të drejtpërdrejtë në proceset negociuese.
