Kreu i Partisë Demokratike, Sali Berisha, ka paraqitur një plan ekonomik transformues gjatë një takimi me demokratët në Gjirokastër, në kuadër të 34-vjetorit të themelimit të PD-së.
Gjatë këtij takimi, Berisha kritikoi ashpër qeverinë aktuale për shpërdorimin e buxhetit dhe përkeqësimin e kushteve ekonomike në vend, duke theksuar nevojën për një ndryshim të thellë në politikën ekonomike të Shqipërisë.
Në fjalën e tij, Berisha premtroi se do të vendoset një minimum jetik prej 200 eurosh në muaj për çdo qytetar shqiptar, përfshirë pensionistët, të papunët dhe ata që përfitojnë ndihmë ekonomike. Kjo masë, sipas tij, do të ndihmojë në eliminimin e varfërisë dhe përmirësimin e kushteve të jetesës për shtresat më të rrezikuara të shoqërisë.
Kreu i PD-së gjithashtu premtoi rritjen e pagës minimale në 500 euro, duke siguruar se shteti do të mbështesë sipërmarrësit përmes uljes së taksave dhe stimulimit të investimeve, për të kompensuar rritjen e pagave. Ai theksoi se ky ishte një hap i nevojshëm për të ndihmuar qytetarët të përballojnë rritjen e kostos së jetesës dhe për të mbajtur nivelin e punësimit në nivele të qëndrueshme.
Një tjetër masë e rëndësishme në planin e Berishës është kthimi i TVSH-së për mallrat bazë, një vendim që ai beson se do të përmirësojë ndjeshëm standardin e jetesës. Sipas Berishës, kjo masë do të lehtësojë ngarkesën ekonomike për familjet shqiptare dhe do të kontribuonte në rritjen e fuqisë blerëse të qytetarëve.
Berisha gjithashtu kritikoi qeverinë për çmimin e lartë të naftës në Shqipëri, duke e cilësuar atë si një nga shkaqet kryesore të rritjes së kostos së jetesës. Ai premtoi se, në qeverisjen e ardhshme, çmimi i naftës nuk do të jetë më i lartë se ai në Kosovë dhe Maqedoninë e Veriut, duke synuar një balancim të çmimeve të karburanteve dhe reduktimin e ndikimit të tyre në ekonominë shqiptare.
Një tjetër kritikë që Berisha ngriti ishte shpërdorimi i fondeve publike nga qeveria aktuale. Ai përmendi projekte të dështuar, si ndërtimi i rrugëve me kosto shumë më të larta se sa parashikohej, dhe investimet e dyshimta në inceneratorët, të cilët, sipas tij, kanë shpenzuar 200 milionë euro pa sjellë asnjë rezultat konkret.
Kreu i PD-së theksoi se qeveria e ardhshme do të punojë për të ndarë buxhetin e shtetit në mënyrë të drejtë, me gjysmën e tij që do të dedikohet për qytetarët dhe gjysmën tjetër për investime publike. Ky është një plan që, sipas Berishës, do të krijonte mundësi për zhvillim ekonomik dhe përmirësim të kushteve të jetesës për të gjithë qytetarët shqiptarë.
Në përfundim, Berisha u angazhua për një qeverisje të përgjegjshme, të orientuar drejt interesave të qytetarëve dhe me një fokus të theksuar tek ulja e varfërisë dhe rritja e mundësive ekonomike për çdo shqiptar. Ai ftoi të gjithë qytetarët të bashkohen me PD-në në këtë mision, duke kërkuar një Shqipëri më të drejtë dhe me mundësi të barabarta për të gjithë.
