Kryetari i Partisë Demokratike, Sali Berisha, ka reaguar pas kërkesës së kryeministrit Edi Rama që të hetohet gjyqtari Erjon Bani për nxjerrjen e dokumenteve të dosjes “Toyota Yaris”.
Rama i kërkoi kreut të SPAK, Altin Dumani, që të ndërhyjë lidhur me këtë çështje, duke e akuzuar Bani për shkelje të vendimit të tij.
Në përgjigjen e tij, Berisha u shpreh se do të publikojë çdo dokument që ka lidhje me veprimet e qeveritarëve të përfshirë në krim, përveç atyre që kanë përmbajtje intime. Ai tha se kryeministri është i shqetësuar nga denoncimet e tij dhe përpiqet të mobilizojë botën e krimit kundër tij.
“Toyota Yaris i ngeli në gojë, por unë do të vazhdoj të publikoj çdo dokument që ka të bëjë me lidhjet e qeveritarëve me krimin. Ata janë të mbrojtur për momentin, sepse nëse SPAK do të vepronte, Taulant Balla do të ishte në burg,” tha Berisha. Ai theksoi se ka të drejtë të publikojë çdo informacion që i shërben interesit publik.
Berisha komentoi gjithashtu ndryshimet në rrethanat politike, duke përmendur përmbysjen e ndikimit të Xhorxh Sorosit dhe të gjitha lëvizjet e tjera që kanë ndryshuar klimën politike në Shqipëri. Sipas tij, nuk ka më mbështetje ndërkombëtare për qeverinë aktuale, siç kishte ndodhur në të kaluarën, dhe ky është një shqetësim i madh për Ramën.
Ai e quajti të pavend kërkesën e Ramës për të hetuar gjyqtarin, duke e përmendur këtë si një tentativë për të shpërqendruar vëmendjen nga denoncimet e tij. Berisha akuzoi gjithashtu Ramën për të kaluarën e tij, duke kujtuar se ai është “biri i një xhelati”, duke iu referuar babait të kryeministrit, i cili ka qenë i përfshirë në ekzekutimin e poeti të njohur, Havzi Nela.
“Çdo njeri mund të merret me biografinë e dikujt, por Edi Rama nuk ka asnjë të drejtë të merret me të kaluarën e të tjerëve, pasi ai vetë ka një të kaluar të errët,” tha Berisha. Ai theksoi se historia e Ramës nuk mund të krahasohet me atë të njerëzve të tjerë dhe se ai duhet të kërkojë falje për veprimet e babait të tij, i cili ka firmosur ekzekutimin e një figure të shquar si Havzi Nela.
