Kreu i Partisë Demokratike, Sali Berisha, ka reaguar ashpër pasi një shtëllungë tymi u pa sot mbi taracën e Bashkisë së Tiranës.
Në një postim në Facebook, Berisha akuzoi kryebashkiakun Erion Veliaj për djegien e dokumenteve dhe provave komprometuese.
“Lali Vjedhësi po djeg prova dhe dokumenta!”, shkroi ish-kryeministri, duke lënë të kuptohet se Veliaj mund të jetë duke fshehur gjurmë të aferave të mundshme korruptive.
Pamjet e tymit mbi godinën e bashkisë kanë ngritur pikëpyetje dhe kanë shkaktuar reagime të ndryshme në opinionin publik. Megjithatë, deri më tani, nuk ka pasur një shpjegim zyrtar nga institucionet për natyrën e zjarrit apo tymit të evidentuar.
Nga ana tjetër, Bashkia e Tiranës nuk ka reaguar ende lidhur me akuzat e Berishës. Ndërkohë, kjo nuk është hera e parë që opozita ngre akuza për keqmenaxhim dhe korrupsion ndaj administratës lokale, sidomos pas burgosjes së Veliajt.
Në rrjetet sociale, mbështetësit e opozitës kanë shpërndarë gjerësisht postimin e Berishës, duke kërkuar transparencë dhe shpjegime nga autoritetet. Ndërkohë, përkrahësit e mazhorancës e kanë konsideruar akuzën si një tjetër sulm politik pa prova konkrete.
Në mungesë të një deklarate zyrtare, debati vazhdon të jetë i hapur, ndërsa qytetarët presin një sqarim nga institucionet për çfarë ka ndodhur realisht në godinën e Bashkisë së Tiranës.
