Sali Berisha sulmon sërish SPAK-un duke e quajtur institucion të korruptuar dhe duke pretenduar se dosjet mbyllen kundrejt ryshfeteve në shuma të mëdha parash.
Kreu i Partisë Demokratike, Sali Berisha, ka vijuar me qëndrimet sulmuese ndaj reformës në drejtësi, duke e cilësuar atë një projekt të dështuar që, sipas tij, i ka sjellë vendit vetëm kolaps dhe pasiguri. Në mbledhjen e grupit parlamentar, ai përsëriti se reforma u ndërtua mbi idetë e George Soros, të cilat, sipas tij, nuk i kanë shërbyer aspak interesit publik.
“Faktet flasin qartë për rrënimin e këtij sistemi,” u shpreh Berisha, duke theksuar se vonesat e gjata në zbardhjen e vendimeve gjyqësore janë tregues i mungesës së funksionimit normal të drejtësisë. Ai solli si shembull rastet kur zbardhja e vendimeve kërkon mbi 1200 ditë, duke e cilësuar këtë si standard absurd dhe të papranueshëm.
Sipas tij, të gjithë ata që promovuan dhe mbështetën reformën, po shfaqen sot në një përpjekje të dëshpëruar për të mbuluar dështimet. Mirëpo, Berisha theksoi se realiteti nuk mund të fshihet, sepse qytetarët po përballen çdo ditë me pasojat e këtij sistemi të deformuar.
Në qendër të akuzave të tij ishte përsëri SPAK-u, të cilin ai e quajti “institucionin më të korruptuar” të drejtësisë shqiptare. Sipas Berishës, hetimet dhe dosjet nuk trajtohen në bazë të fakteve dhe provave, por në bazë të ryshfeteve dhe interesave të fshehta.
“Ata që premtonin se korrupsioni do të binte, në fakt e kanë rritur atë,” deklaroi ai. Sipas tij, korrupsioni në vend është shumëfishuar dhe tashmë kap dimensione të paprecedenta.
Berisha pretendoi se dosjet e zyrtarëve të lartë “kthehen në turshi” dhe mbyllen përmes ndërhyrjeve financiare. Ai përmendi si shembull hetimet që lidhen me projektet që kapin shifra të mëdha, duke thënë se pavarësisht abuzimeve të denoncuara publikisht, përgjegjësit shpëtojnë përmes pagesave nën dorë.
Ndërsa i referohej një rasti konkret, ai deklaroi se dëmet ekonomike janë të mëdha, por se ndëshkimi bie në shuma qesharake, gjë që sipas tij tregon qartë pazaret e fshehta dhe një realitet të errët në organet e drejtësisë.
Në përfundim, ai theksoi se “vendit po i bëhet dëm i pallogaritshëm” dhe se reforma, në vend që të sillte drejtësi, ka krijuar një sistem që, sipas tij, mbron korrupsionin dhe godet besimin e qytetarëve.
