Presidenti i Republikës së Shqipërisë, Bajram Begaj, ka nisur vizitën e tij zyrtare dyditore në Malin e Zi, duke e filluar nga komunat shqiptare të Tuzit dhe Plavë-Gucisë.
Pritja që i ishte rezervuar ishte vëllazërore dhe festive, ku ansambli “Besa” e përshëndeti Presidentin me një performancë të bukur të “Valles së Mejdanit” në sheshin ku ndodhet monumenti i heroit kombëtar, Gjergj Kastrioti Skënderbeu. Në këtë shesh, Begaj vendosi një kurorë me lule, duke nderuar kështu figurën e Skënderbeut, dhe më pas u përshëndet me qytetarët e pranishëm.
Presidenti Begaj zhvilloi një takim me drejtues të komunës së Tuzit dhe përfaqësues politikë të shqiptarëve në institucionet e Malit të Zi. Në këtë takim, ai diskutoi për forcimin e pozita shqiptare në rajon dhe për angazhimin e përbashkët për të mirën e shqiptarëve. Begaj i inkurajoi drejtuesit e Tuzit të vazhdojnë përpjekjet e tyre për ruajtjen e identitetit dhe për mbrojtjen e të drejtave dhe lirive themelore të shqiptarëve në Mal të Zi. Ai theksoi gjithashtu se Shqipëria do të vazhdojë të mbështesë shqiptarët në këtë proces.
Në takimin e tij me veprimtarët shqiptarë të Plavës e Gucisë, Presidenti Begaj u njoh me sfidat që ata po përballen, duke përfshirë problemet e emigrimit dhe asimilimit. Ai theksoi rëndësinë e gjetjes së rrugëve për të ruajtur dhe forcuar identitetin shqiptar në këto zona, përballë këtyre sfidave. Begaj lavdëroi shqiptarët që kanë arritur të ruajnë gjuhën dhe kulturën e tyre, dhe premtoi se do të mbështesë projekte zhvillimore që do të ndihmojnë ekonomikisht këto treva.
Një tjetër aspekt i rëndësishëm që Presidenti Begaj përmendi ishte zhvillimi i projekteve ndërkufitare mes Shqipërisë, Kosovës dhe Malit të Zi. Ai theksoi se ky bashkëpunim është i rëndësishëm për të forcuar marrëdhëniet mes këtyre vendeve dhe për të mundësuar zhvillimin e këtyre rajoneve. Begaj i bëri thirrje të gjithëve që të mbështesin këto projekte për të sjellë përfitime të shumta për të rinjtë dhe për të ardhmen e këtyre zonave.
Në fjalën e tij, Presidenti Begaj theksoi rëndësinë e mbrojtjes së çështjes kombëtare dhe të gjuhës shqipe. Ai u shpreh se çështja kombëtare duhet të jetë mbi çdo interes politik, pasi është një çështje e rëndësishme për të gjithë shqiptarët. Begaj theksoi se duhet të punohet më shumë për të promovuar, trashëguar dhe kultivuar gjuhën shqipe, dhe kjo mund të arrihet vetëm me angazhimin e çdo individi shqiptar, pavarësisht moshës dhe statusit.
Në përfundim, Presidenti i Republikës siguroi shqiptarët e Malit të Zi se do të jetë gjithmonë në dispozicionin e tyre dhe do të punojë për mbrojtjen e interesave madhore kombëtare. Ai premtoi se një mesazh i tillë do t’i përcillet edhe presidentit të Malit të Zi, Milatovic, me qëllim zhvillimin e këtyre zonave dhe ofrimin e mundësive për rininë shqiptare që të mbeten dhe të punojnë në trojet e tyre.
