Një tender 22 milionë lekësh në Shkodër, i destinuar për ushqimin e fëmijëve, është kthyer në shembull tipik të abuzimit me fondet publike.
Në Bashkinë Shkodër, të drejtuar nga Benet Beci, është zbuluar një aferë e rëndë financiare lidhur me tenderin “Blerje e artikujve ushqimorë”, me numër reference REF-44826-04-12-2025. Fitues doli kompania SEAD-SGS shpk, në pronësi të Entela Liçit, me një ofertë 22,266,682 lekë pa TVSH, që përbën 99.6% të fondit limit prej 22,354,848 lekësh.
Pavarësisht se në garë morën pjesë vetëm dy kompani, Bashkia Shkodër shpalli fituese ofertën më të lartë, duke anashkaluar diferencën prej 35 milionë lekësh të vjetra me ofertën tjetër. Ky fakt tregon mungesë të plotë të konkurrencës reale dhe dyshime për manipulim të qëllimshëm të procesit.
Abuzimi bëhet edhe më i rëndë po të merret parasysh se këto fonde janë për ushqimet e çerdheve, kopshteve dhe Strehëzës për fëmijët pa kujdes prindëror. Në këtë mënyrë, korrupsioni ka prekur drejtpërdrejt ushqimin e përditshëm të fëmijëve, duke e kthyer këtë tender në një shembull tronditës të shpërdorimit të parave publike.
Kjo skemë tregon qartë sesi paratë e destinuara për shëndetin dhe mirëqenien e fëmijëve mund të përfundojnë në xhepat e pak personave të lidhur me pushtetin vendor. Për më tepër, mungesa e transparencës dhe procedurat e mbyllura i japin më shumë peshë dyshimeve për marrëveshje të fshehta.
Rasti ngre pikëpyetje serioze për menaxhimin e Bashkisë Shkodër dhe për rolin e institucioneve të drejtësisë, të cilat deri tani kanë heshtur përballë këtij skandali. Hetimet e menjëhershme do të ishin hapi minimal për të mbrojtur interesin publik dhe për të garantuar që fëmijët nuk mbeten viktima të korrupsionit.
Nëse ky precedent nuk ndalet, rreziku është që abuzime të ngjashme të bëhen normë, duke e kthyer administratën vendore në një mjet për pasurim personal, e jo për shërbim ndaj qytetarëve.
