Pas disa raportimeve nga TV Apollon mbi mungesën e sinjalistikës rrugore në qytetin e Urës Vajgurore, Bashkia Dimal ka reaguar.
Kjo mungesë ishte bërë shqetësim për qytetarët, pasi mungonin vijëzimet e rrugëve në kryqëzime dhe vendkalime, duke e bërë kalimin të rrezikshëm për ta.
Ky problem ndikonte veçanërisht në sigurinë e këmbësorëve pranë institucioneve, siç janë shkollat.
Drejtues në Bashkinë Dimal, Albano Kora, shprehu falenderime për TV Apollon për vëmendjen e treguar mbi përmirësimin e sinjalistikës në këtë zonë.
Ai njoftoi se është ngritur një grup pune për të verifikuar sinjalistikën, vijat e bardha, vendet e parkimit dhe pengesat në qytet dhe në fshatra.
Grupi i punës ka dalë në terren për të inspektuar zonat rreth shkollave, hyrje-daljet e qytetit dhe zonat e parkimit.
Ky veprim synon të përmirësojë sigurinë rrugore për qytetarët dhe këmbësorët në mjediset publike të Bashkisë Dimal.
