Kreu i grupit parlamentar të Partisë Demokratike, Gazment Bardhi, mori pjesë në ceremoninë e “Mëngjesit të Lutjeve” në Washington, një ngjarje që mbledh liderë politikë dhe përfaqësues nga mbi 120 vende të botës.
Gjatë vizitës së tij zyrtare, Bardhi pati mundësinë të takohej me miq amerikanë dhe përfaqësues të vendeve të ndryshme, duke ndarë pikëpamjet mbi zhvillimet politike ndërkombëtare dhe rolin e Shqipërisë në rajon.
Në një deklaratë pas aktivitetit, ai theksoi rëndësinë e marrëdhënies mes Shqipërisë dhe Shteteve të Bashkuara, duke e cilësuar atë si një aleancë të përhershme dhe të palëkundur.
“Në Washington DC, pata kënaqësinë të marr pjesë në ceremoninë e Lutjeve të Mëngjesit dhe të diskutoj me liderë nga e gjithë bota mbi situatën politike dhe perspektivën e Shqipërisë në rajon e më gjerë,” u shpreh Bardhi.
Ai vlerësoi praninë e ish-presidentit Donald Trump në këtë ngjarje, duke e konsideruar një sinjal pozitiv për sigurinë dhe stabilitetin global.
“Fjala e Presidentit Trump më shton bindjen se bota do të jetë më e sigurt dhe më e begatë gjatë drejtimit të tij, veçanërisht në aspektet e ekonomisë, sigurisë dhe demokracisë,” theksoi Bardhi.
Në përfundim, ai përsëriti angazhimin për forcimin e miqësisë mes Shqipërisë dhe Shteteve të Bashkuara, duke uruar që kjo aleancë të mbetet e fuqishme në të gjitha nivelet.
