Drejtuesi politik i Partisë Demokratike për Qarkun Fier, Gazmend Bardhi, ka marrë pjesë në një takim me të rinjtë në Lushnje, ku është diskutuar mbi rëndësinë e angazhimit rinor për forcimin e partisë dhe përgatitjen e kandidatëve për zgjedhjet e 11 majit.
Takimi ishte organizuar nga Forumi Rinor i Partisë Demokratike dhe kishte si qëllim prezantimin e kandidatëve të rinj nga Lushnja, të cilët do të përfaqësojnë interesat e të rinjve në këto zgjedhje, raporton Mukades Dervishi.
Bardhi gjatë fjalës së tij theksoi se angazhimi i rinisë është kyç për të ardhmen e Partisë Demokratike, jo vetëm në kuadër të zgjedhjeve të afërta, por edhe për të siguruar vazhdimësinë e partisë në vitet në vijim. Ai ftoi të rinjtë që të angazhohen dhe të bëhen pjesë aktive e politikës, duke theksuar se ata do të jenë ata që pas 10 apo 15 vitesh do të përfaqësojnë vendin në Parlament.
Në këtë takim, ishin të pranishëm një numër i madh të rinjsh, studentësh dhe maturantësh, të cilët janë konsideruar si forca vitale e Partisë Demokratike. Bardhi e vlerësoi këtë pjesëmarrje si një shenjë të qartë të energjisë rinore që është e gatshme të mbajë mbi supe përgjegjësinë për të ardhmen e vendit.
“Ju jeni ata që do të përfaqësoni jo vetëm qytetarët e Lushnjes, por gjithë Shqipërinë. Angazhimi juaj është kyç, sepse ky është momenti për të ndihmuar në ndërtimin e një shoqërie më të drejtë dhe më të zhvilluar,” tha Bardhi gjatë fjalës së tij.
Ai theksoi se Partia Demokratike ka nevojë për ide të reja dhe për energji rinore për të realizuar ndryshime të mëdha në vend. Sipas tij, të rinjtë janë ata që mund të sjellin ndryshimin e duhur dhe që do të mund të ndihmojnë në krijimin e një Shqipërie më të mirë.
Pjesëmarrësit në këtë ngjarje shprehën gatishmërinë për t’u angazhuar më tej, duke premtuar se do të kontribuojnë në forcimin e strukturave rinore të PD-së, në mënyrë që partia të vijojë të rritet dhe të ketë një ndikim të fuqishëm në politikën shqiptare.
Në përfundim, Bardhi u bëri thirrje të rinjve që të mos humbasin mundësinë për të marrë pjesë aktivisht në proceset politike dhe të kontribuojnë në ndryshimet që do të sjellin një të ardhme më të ndritur për Shqipërinë.
