Sekretari i Përgjithshëm i Partisë Demokratike, Gazment Bardhi, ka reaguar ashpër për mungesën e Policisë së Shtetit gjatë grumbullimit të punonjësve të Bashkisë së Tiranës në ambientet e GJKKO dhe SPAK, ku po zhvilloheshin procedurat për Erion Veliajn.
Sipas Bardhit, mosprania e policisë në këtë tubim është një akt presioni nga ana e pushtetit dhe një ndërhyrje e papranueshme në punën e institucioneve të drejtësisë. Ai e cilësoi këtë si një precedent të rrezikshëm për funksionimin e shtetit ligjor.
Përmes një deklarate publike, Bardhi i bëri thirrje efektivëve të policisë që të refuzojnë urdhrat e paligjshëm dhe të vijojnë detyrën e tyre me përkushtim, duke respektuar shtetin dhe të ardhmen europiane të Shqipërisë.
“Braktisja nga Policia e Shtetit e gjyqtarëve dhe prokurorëve në krye të detyrës është një krim i rëndë shtetëror,” shkroi Bardhi në rrjetet sociale, duke theksuar se një situatë e tillë është e papranueshme në një vend demokratik.
Ai akuzoi kryeministrin Edi Rama për përdorimin e metodave të paligjshme për të ndikuar në institucionet e drejtësisë, duke e konsideruar këtë si një përpjekje për të mbrojtur interesat e pushtetit të tij.
Në deklaratën e tij, Bardhi kërkoi ndërhyrjen e menjëhershme të institucioneve për të ndalur presionet ndaj gjyqtarëve dhe prokurorëve. Ai theksoi se drejtësia duhet të funksionojë e lirë dhe e pavarur, pa ndërhyrje nga politika.
Sipas tij, kjo situatë është një tjetër tregues i degradimit të institucioneve nën drejtimin e qeverisë aktuale. Bardhi paralajmëroi se opozita nuk do të heshtë përballë këtyre zhvillimeve dhe do të mbrojë të drejtën për një drejtësi të pavarur.
