Fshati Varibop përballet me mungesë të theksuar të ujit të pijshëm, furnizimi zgjat vetëm 10 minuta çdo ditë prej muajit Maj
Banorët e fshatit Varibop, në bashkinë e Fierit, kanë dalë në protestë për shkak të mungesës së ujit të pijshëm, problem që përsëritet çdo vit gjatë sezonit të verës. Sipas tyre, që prej fillimit të muajit Maj, furnizimi me ujë është i kufizuar vetëm në 10 minuta çdo ditë, çka ka sjellë vështirësi të mëdha në jetën e përditshme.
Qytetarët shprehen se paguajnë rregullisht detyrimet, por pavarësisht kësaj, u duhet të mbushin ujë nga burime të largëta ose të shpenzojnë për të blerë ujë me autobotë. Ata theksojnë se kanë bërë vazhdimisht ankesa pranë institucioneve përgjegjëse, por deri më tani kanë marrë vetëm premtime, pa asnjë zgjidhje konkrete.
Situata përkeqësohet çdo vit gjatë periudhës maj-tetor, kur konsumi i ujit rritet ndjeshëm dhe burimet e fshatit nuk përballojnë kërkesën. Banorët ndihen të neglizhuar nga autoritetet dhe kërkojnë masa të menjëhershme për të garantuar furnizimin normal me ujë.
Drejtoria e Ujësjellës-Kanalizimeve lajmëroi se po harton një plan masash për të parandaluar shpërdorimin e ujit të pijshëm, duke intensifikuar inspektimet në zonë në bashkëpunim me Task Forcën. Qëllimi është të përmirësohet situata dhe të gjendet një zgjidhje e qëndrueshme për komunitetin e Varibopit.
Banorët e këtij fshati kërkojnë që institucionet të kalojnë nga premtimet në veprime konkrete, për t’i dhënë fund krizës shumëvjeçare të ujit dhe për të garantuar një jetesë dinjitoze për të gjithë komunitetin.
