Banorët e Rrjollit u mblodhën këtë të mërkurë përpara ambienteve të Prokurorisë së Posaçme, duke zhvendosur protestën e tyre kundër ndërtimit të një resorti turistik në zonë.

Me thirrje kundërshtuese dhe pankarta në duar, ata kërkuan zhvillimin e një takimi me prokurorët e SPAK, duke theksuar se projekti në fjalë cenon pronat e tyre.

Protestuesit deklaruan se ndërtimi i resortit prek drejtpërdrejt tokat që ata pretendojnë si pronë të ligjshme dhe se nuk do të tërhiqen nga kundërshtimi i tyre. Sipas tyre, reagimi do të vijojë deri në sqarimin e plotë të situatës.

Tubimi para SPAK vjen pas disa ditësh protestash të zhvilluara në Rrjoll të Velipojës, ndërsa banorët paralajmërojnë se do të vazhdojnë mobilizimin kundër realizimit të këtij projekti.