Banorët e fshatit Qinam në Kolonjë kanë protestuar këtë të shtunë kundër vendosjes së paneleve diellore në kullotat që prej dekadash shërbejnë si burim kryesor jetese për dhjetëra familje blegtorësh. Ata shprehen se humbja e kullotave do të thotë humbje e aktivitetit ekonomik dhe largim i detyruar nga fshati.
Sipas banorëve vendimmarrja e bashkisë nuk ka marrë parasysh shqetësimet e tyre, pavarësisht diskutimeve të zhvilluara. Ata thonë se ndihen të pa përfaqësuar dhe të braktisur nga institucionet.
Kullotat dhe arat që synohet të zëvendësohen me panele diellore janë ndarë mes familjeve të fshatit prej brezash dhe përbëjnë burimin bazë të ushqimit për rreth tre deri në katër mijë krerë bagëti, mes tyre rreth gjashtëqind lopë. Banorët theksojnë se humbja e këtyre hapësirave do të bllokojë të gjithë ciklin bujqësor dhe blegtoral të zonës.
Një fermer thotë se vendosja e paneleve mund të zhdukë përfundimisht dhjetë familjet e fundit që jetojnë vetëm nga blegtoria.
Banorët e Qinamit kërkojnë ndërhyrjen e institucioneve për të mbrojtur kullotat, të cilat i konsiderojnë thelbësore për mbijetesën e tyre ekonomike.
