Banorët e disa fshatrave në zonën e Kolonjës kanë dalë në protestë në Qafzez, pranë urës së Baba Selimit, në pikën ku kalon lumi Osum. Shkak për protestën është bllokimi dhe izolimi i më shumë se 10 fshatrave për shkak të reshjeve të dendura dhe përmbytjeve që kanë nisur një javë më parë.
Sipas banorëve, situata po përkeqësohet çdo ditë, pasi në zonat e thella ka persona të sëmurë që po presin në mëshirë të fatit, pa mundësi për t’u transportuar drejt qendrave shëndetësore.
Ata kërkojnë reagim të menjëhershëm nga institucionet, duke theksuar se ura që lidh fshatrat me rrugën kryesore është dëmtuar rëndë dhe nuk lejon asnjë lloj kalimi. Banorët apelojnë për ndërhyrje urgjente, pasi izolimi i tyre po vijon të rrezikojë jetën dhe aktivitetin e përditshëm të komunitetit.
