Avokati i njohur Gylsen Zhllima ka zyrtarizuar kandidaturën e tij për postin e kryebashkiakut të Tiranës, duke hyrë në garën e zgjedhjeve të 9 nëntorit me sloganin “Tirana, vizioni ynë”.
Përmes një postimi në rrjetet sociale, Zhllima konfirmoi synimin për të drejtuar kryeqytetin dhe për të sjellë, siç u shpreh ai, “një frymë të re në qeverisjen vendore”. Ai e konsideroi Tiranën si “zemrën e zhvillimit të vendit” dhe theksoi se qyteti ka nevojë për projekte konkrete që përmirësojnë jetën e qytetarëve, jo për premtime boshe.
Sipas tij, platforma “Tirana vizioni ynë” do të fokusohet në ndërtimin e një qyteti të gjelbër, të aksesueshëm dhe të drejtë për të gjithë. Ai shtoi se do të angazhohet për të reduktuar trafikun, ndotjen dhe abuzimet me hapësirat publike, duke vendosur qytetarin në qendër të vendimmarrjes.
Zhllima, një emër i njohur në fushën e jurisprudencës, ka theksuar gjatë viteve të fundit angazhimin e tij në çështje të rëndësishme publike dhe mbrojtjen e të drejtave qytetare. Ai u shpreh se përvoja e tij si avokat do ta ndihmojë në ndërtimin e një administrate bashkiake transparente dhe efikase.
Zgjedhjet e pjesshme vendore do të mbahen më 9 nëntor në gjashtë bashki të vendit, përfshirë edhe Tiranën, ku pritet një garë e fortë mes kandidatëve që kërkojnë të fitojnë besimin e kryeqytetasve.
Kandidatura e Zhllimës shihet si një prurje e re në skenën politike lokale, që mund të sjellë debat dhe ide të reja në drejtimin e kryeqytetit. Ai ka paralajmëruar se në ditët në vijim do të prezantojë ekipin dhe programin e plotë për Tiranën e së ardhmes.
