Një atmosferë e mrekullueshme mbizotëron këtë të diel të Pashkëve në Parkun Kombëtar Divjakë–Karavasta, ku natyra ka ofruar bukuritë e saj unike dhe moti i ngrohtë ka favorizuar një frekuentim të lartë të vizitorëve.

Në këtë ditë festive, parku është mbushur me turistë vendas dhe të huaj, të cilët po shijojnë qetësinë, natyrën dhe peizazhet karakteristike të zonës.

Temperaturat e këndshme dhe dielli i pranverës e kanë bërë këtë ditë ideale për shëtitje, relaks dhe momente të bukura me familjen dhe miqtë, në frymën e festës së Pashkëve.

Vizitorët janë ndalur kryesisht pranë lagunës së Karavastasë, ku kanë shijuar pamjet e rralla të biodiversitetit dhe qetësisë që ofron kjo zonë e mbrojtur.

Shumë prej tyre kanë zgjedhur të eksplorojnë shtigjet natyrore, duke e kthyer ditën në një përvojë të veçantë mes gjelbërimit dhe ajrit të pastër.
Restorantet dhe zonat e pushimit brenda parkut kanë qenë gjithashtu të frekuentuara, duke reflektuar rritjen e vizitueshmërisë gjatë fundjavës festive.

Autoritetet lokale dhe punonjësit e parkut kanë qenë në terren për të garantuar mbarëvajtjen e vizitave dhe ruajtjen e mjedisit natyror.