Policia ndaloi në kufirin e Kapshticës një 28-vjeçar të shpallur në kërkim, i dyshuar për dhunimin brutal të një 37-vjeçari në pedonalen e Vaut të Dejës më 19 gusht.
Policia Kufitare e Kapshticës ka bërë të mundur ndalimin e Geralt Hoxhës, 28 vjeç, banues në Klos të Matit, i cili ishte shpallur në kërkim për një ngjarje të rëndë të ndodhur më 19 gusht 2025 në qytetin e Vaut të Dejës. Pas arrestimit, autoritetet kufitare informuan menjëherë policinë e Shkodrës për procedurat e mëtejshme.
Sipas të dhënave zyrtare, Hoxha dyshohet se së bashku me një tjetër person ende të paidentifikuar, ka sulmuar rëndë me grushte dhe sende të forta një 37-vjeçar, me inicialet D. L., në pedonalen përballë godinës së Bashkisë së Vaut të Dejës.
Ngjarja, e cila tronditi opinionin publik të zonës, u konsiderua një akt i dhunshëm barbar, ndërsa autoritetet nisën menjëherë hetimet për kapjen e autorëve. Pas disa javësh kërkimesh, njëri prej tyre është vënë në pranga në kufirin me Greqinë.
Policia ka konfirmuar se përveç arrestimit të Hoxhës, hetimet po vijojnë intensivisht për identifikimin dhe kapjen e bashkëpunëtorit tjetër të përfshirë në këtë ngjarje.
“Ky shtetas ishte shpallur në kërkim për dhunë të rëndë ndaj një 37-vjeçari. Hetimet vijojnë për zbardhjen e plotë të rrethanave dhe për arrestimin e personit tjetër të përfshirë,” thuhet në njoftimin zyrtar të policisë.
Në bashkëpunim me Prokurorinë, autoritetet po punojnë për të dokumentuar çdo detaj të rastit, ndërsa pritet që hetimet të sjellin zhvillime të reja mbi motivet dhe përgjegjësitë e plota të autorëve.
