Një 49-vjeçar është arrestuar nga policia, pasi dyshohet se ka bashkëpunuar në kultivimin e 2,285 bimëve narkotike kanabis në fshatin Aliaj, Shkodër.
Në pranga ka rënë Shpëtim Çulaj, banues në të njëjtin fshat. Ai ishte shpallur në kërkim për veprat penale “Kultivimi i bimëve narkotike” dhe “Prodhimi dhe shitja e narkotikëve”. Bimët narkotike me të cilat dyshohet se ka qenë i përfshirë janë zbuluar dhe asgjësuar nga policia më 6 shtator 2025.
Arrestimi u krye si rezultat i kontrolleve të vazhdueshme për kapjen e personave në kërkim, bazuar edhe në informacione të mbledhura në rrugë operative nga specialistët e Seksionit për Hetimin e Narkotikëve.
Materialet procedurale janë dërguar në Prokurorinë pranë Gjykatës së Shkallës së Parë të Juridiksionit të Përgjithshëm Shkodër për veprime të mëtejshme.
