Dy shtetase kineze janë arrestuar në Shkodër, pasi akuzohen se ushtronin prostitucion në një apartament të marrë me qira në qytet. Në pranga kanë rënë Sh. J., 34 vjeçe, dhe Y. P., 46 vjeçe, të cilat dyshohet se kishin përshtatur banesën për këtë veprimtari të paligjshme.
Gjithashtu është arrestuar edhe një 37-vjeçar shqiptar, me inicialet E. K., i dyshuar si i përfshirë në organizimin e aktivitetit.
Gjatë kontrollit të banesës, policia ka gjetur dhe sekuestruar një shumë parash të dyshuar të përfituar nga prostitucioni, si edhe pesë celularë.
Operacioni policor i koduar “Rent house 2” u zhvillua nga strukturat e Hetimit të Narkotikëve në bashkëpunim me Komisariatin e Policisë Shkodër dhe Seksionin e Mbështetjes Operacionale. Si rezultat, u zbulua apartamenti në lagjen “Parrucë” ku ushtrimi i prostitucionit kryhej në mënyrë të organizuar.
Nën drejtimin e Prokurorisë vijojnë veprimet hetimore për dokumentimin e plotë të rastit dhe identifikimin e personave të tjerë të përfshirë. Materialet procedurale janë referuar Prokurorisë Shkodër për veprime të mëtejshme.
