RAPORTON MUKADES DERVISHI
Një 38-vjeçar dyshohet se ka tentuar të blejë votën në favor të një subjekti politik, duke iu premtuar para një shtetasi dhe përdorur në mënyrë të paligjshme dokumentin e identifikimit, raporton gazetarja MUKADES DERVISHI.
Specialistët për Hetimin e Krimeve të Komisariatit të Policisë Lushnjë kanë arrestuar në flagrancë shtetasin M. L., 38 vjeç, banues në Lushnjë, për shkeljet e dyshuara të “Korrupsionit aktiv në zgjedhje” dhe “Marrja dhe përdorimi i paligjshëm i dokumentit të identifikimit”.
Hetimet, të kryera në bashkëpunim me Prokurorinë e Fierit, kanë zbuluar se M. L. i ka marrë një shtetasi kartën e identitetit dhe i ka premtuar dhënien e një shume parash. Dyshohet se ky veprim është bërë me qëllim blerjen e votës së këtij shtetasi në favor të një subjekti politik që merr pjesë në zgjedhjet parlamentare të planifikuara për datën 11.05.2025.
Për të mbështetur dyshimet, është sekuestruar karta e identitetit e shtetasit që iu premtuan paratë. Ky veprim ka bërë që materiali hetimor të kalojë në duar të Prokurorisë për Korrupsionin dhe Krimin e Organizuar për veprime të mëtejshme.
