Një punonjës i OSSH-së në Vlorë u arrestua në flagrancë, pasi mori ryshfet për të ndihmuar një subjekt privat të shmangte pagesat e energjisë.
Një zyrtar i Operatorit të Shpërndarjes së Energjisë Elektrike (OSSH) në Vlorë përfundoi në pranga pas dyshimeve për përfshirje në një akt korruptiv. Ai u kap në momentin që po merrte 100 euro në këmbim të ndërhyrjes në një aparat matës të energjisë, për të favorizuar një biznes lokal.
Në këtë operacion u përfshi dhe një 42-vjeçar tjetër, i cili shoqëroi zyrtarin gjatë aktit. Ky shtetas kishte më parë një masë sigurie “arrest në shtëpi” për trafikim të lëndëve narkotike dhe u kap në shkelje të kësaj mase.
Policia e Vlorës, në bashkëpunim me Seksionin për Hetimin e Krimeve Ekonomike dhe Financiare si dhe strukturat për mbështetjen operative, zhvilluan operacionin e koduar “MATËSI”, i cili u drejtua nga Prokuroria pranë Gjykatës së Juridiksionit të Përgjithshëm të Vlorës.
Personi i arrestuar, 35-vjeçari M. S., mbante detyrën e shefit të ekipit të lexuesve të matësave pranë OSSH Vlorë. Ai dyshohet për shpërdorim detyre dhe korrupsion pasiv, ndërsa kolegu i tij, L. H., për shkelje të vendimit të arrestit në shtëpi.
Gjatë ndërhyrjes, u sekuestruan si prova materiale një shumë prej 100 eurosh, dy aparate celularë dhe një automjet, që dyshohet se u përdor për veprimtarinë korruptive.
Hetimet vazhdojnë për të dokumentuar raste të tjera të ngjashme dhe për të identifikuar persona të tjerë të përfshirë në këtë rrjet. Materialet e grumbulluara tashmë i janë dorëzuar Prokurorisë për veprime të mëtejshme ligjore.
