Manastiri i Ardenicës u mbush me besimtarë e vizitorë, duke rikthyer një traditë të lashtë fetare e kulturore në zemër të Myzeqesë.
Në 8 shtator, dita e Lindjes së Shën Marisë, Manastiri i Ardenicës priti që në orët e para qindra besimtarë ortodoksë nga Durrësi, Tirana, Fieri dhe fshatrat përreth. Atmosfera ishte e mbushur me qetësi shpirtërore dhe emocion, raporton gazetari Ndriçim Gjoshi.
Liturgjia e Shenjtë u zhvillua brenda kishës nën drejtimin e Mitropolitit të Apollonisë dhe Fierit, Imzot Nikolla. Ai përcolli mesazhe të forta për besimin, dashurinë ndaj Zotit dhe nderimin e lindjes së Hyjlindëses Mari, duke e kthyer këtë moment në një çast reflektimi për të gjithë të pranishmit.
Pas shërbesës, festimet u zhvendosën jashtë mureve të manastirit, në sheshin e njohur si zemra e Festës së Ardenicës. Ky hapësirë u mbush me gjallëri, këngë e valle tradicionale, duke e bërë këtë ditë një bashkim të bukur mes besimit dhe kulturës.
Bashkia Lushnje ka ndërmarrë çdo vit rikthimin e kësaj feste, me synimin për të promovuar trashëgiminë shpirtërore, historike dhe turistike të zonës. Për organizimin e këtij viti ishin të pranishëm kryetarja e Bashkisë Lushnje, Eriselda Sefa, Prefekti i Qarkut Fier, Arben Çuko, si dhe deputetët Kiduina Zaka, Asforal Haxhiu dhe Elton Korreshi.
Në fjalën e saj, znj. Sefa uroi besimtarët dhe theksoi rëndësinë e këtij vendi: “Ardenica nuk është thjesht një vend i shenjtë, por një pasuri kulturore që do të kthehet çdo vit në një festë për gjithë Myzeqenë.”
Fëmijët e Qendrës Kulturore të Fëmijëve Lushnje e gjallëruan festën me performancat e tyre artistike, duke e mbushur sheshin me energji e ngjyra. Meloditë dhe vallet popullore krijuan një lidhje të fortë mes brezave, duke ruajtur traditën dhe identitetin kulturor.
Manastiri i Ardenicës, i ndërtuar në vitin 1282, mbetet një prej monumenteve më të rëndësishme të trashëgimisë sonë. Afresket e vëllezërve Zoografi dhe historia e tij shekullore e bëjnë këtë vend një thesar të paçmuar.
Vitet e fundit, ai po shndërrohet gjithnjë e më shumë në një destinacion turistik kulturor. Vizitorët jo vetëm marrin pjesë në aktivitete fetare, por gjithashtu zbulojnë historinë, artin dhe peizazhet unike që e rrethojnë.
Ky kombinim i besimit, kulturës dhe turizmit e kthen Festën e Ardenicës në një ngjarje që mbledh së bashku komunitetin dhe vizitorët nga e gjithë Shqipëria. Kamera e TV Apollon e ndoqi nga afër këtë ditë të veçantë, duke e dokumentuar si një dëshmi të gjallë të traditës dhe mikpritjes myzeqare.
Në fund, Ardenica dëshmon se vlerat shpirtërore dhe ato kulturore mund të bashkohen në një festë që ruan të kaluarën dhe frymëzon të ardhmen.
