Agjencia e Prokurimit Publik ka publikuar një set rekomandimesh për institucionet, pas hetimit administrativ mbi kontratat e blerjes së ushqimeve të lidhura nga 15 autoritete publike.
Pas një analize të detajuar të marrëveshjeve kuadër dhe kontratave për furnizimin me ushqime, Agjencia e Prokurimit Publik (APP) ka përcaktuar hapat që autoritetet kontraktore duhet të ndjekin nga planifikimi i nevojave deri në ekzekutimin e plotë të kontratës. Dokumenti thekson se çdo kontratë brenda një marrëveshjeje kuadër duhet të lidhet mbi bazën e nevojave reale dhe të dokumentuara, duke përfshirë mundësinë e lidhjes së disa minikontratave me afat të shkurtër brenda periudhës së marrëveshjes.
APP kërkon që, para nënshkrimit të kontratës, autoritetet kontraktore të sigurojnë garancinë kontraktore në masën 10% të vlerës totale me TVSH, në përputhje me rregullat e prokurimit publik. Gjithashtu, kërkohet që në çdo kontratë të pasqyrohen qartë artikujt dhe çmimet, në përputhje me ofertën fituese, për të shmangur probleme gjatë zbatimit.
Një tjetër element i theksuar është përgjegjësia e titullarit të institucionit për të caktuar, me urdhër të posaçëm, personin ose strukturën që do të ndjekë zbatimin e kontratës. Kjo masë synon të garantojë mbikëqyrjen dhe përmbushjen e detyrimeve brenda afateve dhe cilësisë së parashikuar.
Për procesin e marrjes në dorëzim të mallit, APP kërkon që komisionet përgjegjëse të hartojnë procesverbale të rregullta dhe të protokolluara, ku të përshkruhen saktësisht mallrat e furnizuara, me tregues sasiorë, cilësorë dhe të vlerës. Ky dokument, sipas udhëzimeve, duhet të jetë i saktë dhe i plotë për të pasur fuqi prove ligjore ose administrative.
Rekomandimet përfshijnë edhe detyrimin e autoriteteve për të verifikuar deklaratat e origjinës dhe të prodhuesit të mallrave të paraqitura nga operatori ekonomik gjatë ofertimit, duke u siguruar që ato përmbushin kriteret e cilësisë të përcaktuara në dokumentet e tenderit dhe kontratë.
Në përfundim, APP rikujton institucionet që të respektojnë afatet dhe format ligjore për hartimin dhe dërgimin e njoftimeve e raporteve që lidhen me kontratat, duke nënvizuar rëndësinë e zbatimit rigoroz të kushteve të prokurimit publik.
