Një analizë e publikuar nga Agjencia Franceze e Lajmeve (AFP) ka zbuluar hollësitë e planit të propozuar nga administrata Trump për përfundimin e luftës në Ukrainë, duke paralajmëruar se zbatimi i tij mund të çojë në humbjen e deri 20% të territorit ukrainas.
Sipas burimeve të AFP-së, dokumenti – që i është siguruar redaksisë nga burime diplomatike – është vlerësuar edhe nga Instituti Amerikan për Studimin e Luftës (ISW), i cili konkludon se Moska do të përfitonte ndjeshëm në aspektin territorial pa qenë e nevojshme një përplasje e re ushtarake.
Plani amerikan parashikon tërheqjen e forcave ukrainase nga disa rajone që aktualisht janë nën kontrollin e tyre, duke i sjellë Rusisë një fitim neto prej rreth 2,300 km², ekuivalente me madhësinë e Luksemburgut. Në bazë të draftit, këto zhvillime do të ndodhnin përmes marrëveshjeve diplomatike dhe jo përmes luftimeve.
Sipas dokumentit, Ukraina do të detyrohej të dorëzonte rreth 5,000 km² në rajonin e Donetskut, për krijimin e një “zone neutrale” që do të ndante forcat ukrainase nga ato ruse. Në këtë territor përfshihen edhe dy qendra strategjike kyçe – Kramatorsk dhe Sloviansk. Përveç kësaj, një enklavë prej 45 km² në Luhansk do të kalonte nën kontrollin e Rusisë.
Në këmbim, Moska do të kthente Ukrainës disa zona më të vogla: 2,000 km² në Kharkiv, 450 km² në Dnipropetrovsk, 300 km² në Sumy dhe vetëm 20 km² në Chernihiv.
Një element thelbësor i planit është njohja de facto e Krimesë si pjesë e territorit rus, si dhe legjitimimi i rajoneve Donetsk dhe Luhansk si entitete nën juridiksionin e Moskës. Rusia do të mbante gjithashtu zonat që kontrollon aktualisht në Kherson dhe Zaporizhia.
Nëse marrëveshja do të hynte në fuqi, Ukraina do të humbiste përfundimisht rreth 20% të territorit, ndërsa do të rikthente më pak se 0.5%. AFP thekson se këto kushte janë të disfavorshme për Kievin dhe do të përforconin ndjeshëm pozitat e Rusisë në rajon.
Raporti nënvizon gjithashtu se gjatë muajit nëntor, forcat ruse kanë avancuar me rreth 400 km², duke intensifikuar ofensivën në lindje të Ukrainës. Deri më 20 nëntor 2025, Rusia kontrollonte rreth 19.3% të territorit ukrainas, përfshirë Krimenë dhe pjesë të Donbasit, të pushtuara që para shkurtit të vitit 2022.
Analistët paralajmërojnë se pranimi i këtij plani do të përfaqësonte një kompromis të dhimbshëm për sovranitetin ukrainas, duke e lënë vendin të kufizuar ushtarakisht dhe politikisht, ndërsa Moska do të konsolidonte përfitime të qëndrueshme territoriale.
