Çështja e një 42-vjeçari shqiptar të kërkuar nga drejtësia australiane për trafikim të sasive rekord droge ka mbetur pa një vendim përfundimtar, pasi Gjykata e Lartë ka vendosur ta kthejë dosjen për rishqyrtim.

Bëhet fjalë për Korab Halilajn, i njohur edhe me identitetet Genardi Sarbu dhe Denis Lika, i arrestuar në Shqipëri për llogari të autoriteteve australiane. Ai akuzohet për trafikimin e mbi 1300 kilogramëve ekstazi dhe rreth 655 kilogramëve metamfetaminë të pastër.

Halilaj ka kundërshtuar vazhdimisht ekstradimin, duke theksuar se legjislacioni australian për veprat penale të drogës parashikon burgim të përjetshëm, ndërsa sipas tij mungon edhe një marrëveshje ekstradimi mes dy vendeve. Këto argumente janë ngritur në çdo fazë të procesit gjyqësor.

Nga ana tjetër, gjykata ka vlerësuar rrezikun e arratisjes, duke marrë në konsideratë faktin se Halilaj rezulton në mungesë që prej verës së vitit 2017 për trafikim narkotikësh. Pikërisht kjo përplasje mes kërkesës për ekstradim dhe masës së sigurisë ka mbetur e pazgjidhur, edhe pas shqyrtimit në Gjykatën e Lartë.

Rasti i Halilajt është pjesë e një serie çështjesh të ngjashme për shqiptarë të kërkuar nga autoritete të huaja për krime droge. Vetëm gjatë vitit të kaluar, 89 shtetas shqiptarë u ekstraduan drejt vendeve të ndryshme, kryesisht për akuza të lidhura me narkotikë në Itali dhe Spanjë.

Në të njëjtën kohë, të dhënat zyrtare tregojnë se shumica e shtetasve të huaj të arrestuar në Shqipëri për llogari të vendeve të tjera janë shtetas turq, të kërkuar kryesisht për mashtrime apo vepra të tjera penale. Një nga rastet më të diskutuara ka qenë ai i Kukunovit, ekstradimi i të cilit u shpall i paligjshëm nga Gjykata Kushtetuese.

Procesi për Halilajn vijon, ndërsa vendimmarrja përfundimtare për ekstradimin e tij mbetet ende e hapur.