PD akuzon AKSHI-n se ka shpenzuar miliona euro me procedura të mbyllura dhe të njëjtit përfitues për mirëmbajtjen e sistemit të informacionit shëndetësor.
Partia Demokratike ngriti sot një tjetër denoncim lidhur me abuzimet e dyshuara në sektorin e shëndetësisë. Sipas selisë blu, gjendja në spitale mbetet e rëndë, me mungesë medikamentesh dhe shërbimesh bazike, ndërsa Agjencia Kombëtare e Shoqërisë së Informacionit (AKSHI) vijon të shpërndajë kontrata shumë milionëshe për mirëmbajtjen e sistemeve digjitale.
Zëdhënësja e PD-së, Genta Vangjeli, deklaroi se gjatë periudhës 2018–2025, AKSHI ka shpenzuar rreth 7 milionë euro me TVSH vetëm për mirëmbajtjen e sistemit të informacionit shëndetësor. Sipas saj, këto procedura janë kryer pa garë, pa transparencë dhe me të njëjtin operator ekonomik.
PD thekson se kontratat për Qendrën Spitalore Universitare “Nënë Tereza” përfshijnë katër pajtime mirëmbajtjeje të lidhura në vitet 2018, 2020, 2022 dhe 2025, me vlerë totale 4.3 milionë euro. Vlera e kontratave është rritur nga rreth 800 mijë euro në vitin 2018 në 1.6 milionë euro në vitin 2025, pavarësisht se objekti i shërbimit mbetet i njëjtë.
Të njëjtën situatë, sipas denoncimit, e reflekton edhe Spitali Universitar i Traumës, ku katër kontrata të lidhura midis viteve 2019 dhe 2025 arrijnë shumën 1.8 milionë euro. PD vëren se shuma për mirëmbajtjen është pothuaj e trefishuar, nga 300 mijë euro në vitin 2019 në 888 mijë euro në vitin 2025.
Ndërkohë, për Spitalin “Shefqet Ndroqi” janë lidhur tre kontrata me vlerë gjithsej 517 mijë euro. Në total, sipas PD-së, janë firmosur 11 kontrata pa konkurrencë, me negocim të mbyllur dhe me të njëjtin përfitues.
Vangjeli tha se kjo praktikë ka krijuar një monopol të mirëfilltë në mirëmbajtjen e sistemit të informacionit shëndetësor, duke ngritur dyshime për abuzime të qëndrueshme me fondet publike.
Partia Demokratike kërkoi që SPAK-u të nisë urgjentisht hetimet mbi këto kontrata dhe të verifikojë nëse janë respektuar dispozitat e ligjit për prokurimet publike. Në veçanti, PD kërkon të sqarohet nëse është cenuar neni 47, që lejon negocim pa shpallje vetëm në raste të jashtëzakonshme.
Selia blu pyet gjithashtu se përse vlerat e kontratave janë rritur në mënyrë të vazhdueshme dhe përse nuk është hapur konkurrencë për operatorë të tjerë ekonomikë, duke përjashtuar alternativa që mund të ofronin çmim më të ulët dhe cilësi të njëjtë shërbimi.
Sipas PD-së, kostoja mujore e mirëmbajtjes së sistemit në QSUT me kontratat e fundit shkon deri në 81 mijë euro në muaj, shumë që cilësohet e pajustifikuar kur spitalet përballen me mungesa të theksuara të barnave dhe pajisjeve jetike.
Në përfundim, Partia Demokratike theksoi se fondet publike duhet të shkojnë për përmirësimin e shërbimit ndaj pacientëve dhe furnizimin me medikamente, jo për kontrata të mbyllura që favorizojnë klientelizmin politik.
