Një raport i shumëpritur mbi hetimin e aksidentit më të rëndë hekurudhor në Greqi është publikuar të enjten, duke zbuluar shkaqet që çuan në tragjedinë që mori 57 jetë dy vjet më parë. Sipas raportit, gabimi njerëzor, infrastruktura e vjetër dhe mangësitë sistematike janë faktorët kryesorë që sollën këtë aksident tragjik.
Raporti i mbushur me detaje prej 180 faqesh doli në dritë në prag të grevës dhe protestave masive të planifikuara për përvjetorin e dytë të këtij aksidenti, i cili ndodhi më 28 shkurt 2023.
Komiteti Hetimor i Pavarur ka zbuluar se një gabim nga një drejtues stacioni ka çuar në dërgimin e një treni pasagjerësh në të njëjtat shina me një tren mallrash që po vinte në drejtim të tij. Përplasja tragjike, e cila mori jetën e 46 pasagjerëve dhe 11 punonjësve, ndodhi pranë Tempit, rreth 400 km në veri të Athinës.
Hetuesit gjithashtu identifikuan mungesën e trajnimit të duhur, deficitet në staf dhe një sistem hekurudhor të vjetër, i cili nuk ofronte kontrolle moderne të sigurisë, si disa nga faktorët që kontribuan në këtë tragjedi. “Një aksident nuk ndodh rastësisht,” thuhet në raport. “Ka një akumulim faktorësh që çojnë në një ngjarje të tillë, pasi edhe njerëzit mund të bëjnë gabime,” shpjegoi Christos Papadimitriou, Drejtor i Autoritetit Helen për Hetimin e Sigurisë Ajrore dhe Hekurudhore, grupi që ka marrë përsipër hetimin.
Papadimitriou theksoi se sistemi hekurudhor grek nuk ka pasur investime të mjaftueshme për modernizimin e tij pas krizës financiare të viteve 2010-2018, gjë që ka ndikuar drejtpërdrejt në sigurinë e tij. Ai gjithashtu theksoi se, sikur të ishin implementuar teknologji moderne sigurie, një aksident i tillë mund të ishte shmangur.
Nga ana e saj, qeveria ka premtuar të marrë masa për të adresuar “mangësitë serioze, mungesën e personelit dhe financimin e pamjaftueshëm”, por ka hedhur poshtë pretendimet e opozitës se ajo ka penguar hetimet.
Për më tepër, qeveria ka vendosur që të dërgojë 5,000 oficerë policie për të patrulluar në Athinë të premten, për të siguruar rendin gjatë demonstratave dhe grevës së përgjithshme që pritet të shkaktojnë ndërprerje të shërbimeve publike dhe aktivitetit tregtar.
